Bu günlərdə sosial şəbəkələrdə 230 min manata avtomobil nömərsinin satışı ilə bağlı olan elan böyük marağa səbəb olub. Elanı David Xamelenko adlı şəxs yerləşdirib. Satışda olan nömrələr belədir:99 TT 999-dur – 230 min manat.
99 LL 999 – 200 min AZN
99 VV 999 – 200 min AZN
99 UU 999 – 200 min AZN.
Baş Dövlət Yol Polisi İdarəsinin ictimai qurtumlarla əlaqələr şöbəsinin rəisi Kamran Əliyev Avtolent.az-a açıqlamasında bildirib ki, heç kim özbaşına dövlət nömrə nişanını sata bilməz: “Hər bir avtomobilə dövlət tərəfindən qeydiyyat nişanı verilir. Kimliyindən asılı olmayaraq bu nömrələri heç kim sata bilməz. Dövlət nömrə nişanı yalnız nəqliyyat vasitəsi satışa çıxarıldığı halda avtomobillə bir yerdə satıla bilər”.
Hər kəsə məlumdur Azərbaycan sürücüsü bahalı avtomobilə sahib olmaq istəyi ilə yanaşı avtomobilin üzərindəki dövlət nömrə nişanın da “zerkalnı”, “bərkgedən” və ya “blatnoy” olmasına diqqət yetirir. Cüt, eynirəqəmli, güzgü effektli bahalı nömrələri almaq bəzən isə əlçatmaz olur.
Aparılan araşdırmalar zamanı məlum olub ki, bu cür nömrələrə sahib olan şəxslər bizneslə məşğul olanlar və yaxud vəzifəli şəxslərin övladlarıdır. Bildiyimiz kimi sosial şəbəkələrdə tez-tez məmur balalarının bahalı avtomobilləri ilə bağlı şəkillər yayılır. Bu cür şəkillərdə diqqət çəkən məqamlardan biri də avtomobillərin üzərində olan bahalı, “zerkalnı” nömrələrdir. Sanki bununla prestij nümayiş edirlər.
Ümumiyyətlə isə , dövlət nömrə nişanı ölkədaxili və yaxud xarici dövlətlərdə nəqliyyatda avtomobilləri fərqləndirmək üçün lazım olan göstəricidir. Bunun üçün dövlər rüsumu da müəyyənləşdirilib. “Dövlət rüsumu haqqında” olan qanunda nömrələrin satışı 22 manatdan başlayır, ən bahalı nömrə isə 2500 manatdır. Qanuna əsasən nömrə müraciət edən avtomobil sahibləri növbəyə dayanaraq sıra ilə nömrə alırlar. Bu nömrə cüt və ya qarışıq rəqəmli də ola bilər. Lakin sürücülər yaxşı nömrəyə sahib olmaq istədikdə yaxşı da pul xərcləmək məcburiyyətində qalırlar. Belə ki, bəzi avtomobil sahibləri rəsmi qurumun ənəkdaşlarına rüşvət və ya “şirinlik” verərək arzuladıqları nömrə nişanını alırlar. Nəticədə qanunsuzluğu elə avtomobil sahiblərinin özləri yaratmış olur. Digərlərindən fərqlənmək üçün bahalı avtomobil nömrələrinə sahib olan sürücülər arasında şou-biznes nümayəndləri, müğənnilər də var.
Qeyd edək ki, müxtəlif hərflərlə 001, 002, 003, 004, 005, 006, 007, 008, 009 nömrələrinə görə dövlət rüsumu 1500 manat müəyyən edilib. Əgər bu rəqəmlərlə olan nömrədə hərflər eyni olarsa, qiymət 2500 manat nəzərdə tutulub. Müxtəlif hərflərlə 100, 200, 300, 400, 500, 600, 700, 800, 900 nömrələri 1000 manat – hərflər eyni olduğu halda 1500 manat, 111, 222, 333, 444, 555, 666, 777, 888, 999 nömrələrində seriya hərfləri müxtəlif olduğu halda dövlət rüsumu 500, eyni olarsa, 1000 manat təşkil edir.
Telefon nömrəsinin sonluğu ilə avtomobil dövlət nişanının nömrəsi ilə eyni olan nömrə əldə etmək isə xüsusi dəb halını alıb. Belə nömrəyə sahib olanlar arasında jurnalist həmkarlarımız da var. Aparıcı-müxbir Natiq Qədimovun dedikləri:
“Avtomobilimin nömrəsi telefon nömrəm ilə uyğundur. Nömrəni maraq xatirinə almışam, sonu 22 ilə bitən nömrələri sevirəm. Mətbuat işçisi olduğumdan nömrə üçün o qədər də xərc çəkmədim, yəni qiymətdə güzəştə getdilər”.
Bahalı avtomobil nömrəyə sahib olmaq təkcə Azərbaycanlı sürücülərə məxsus deyil. Məlum olub ki, dünyanın ən bahalı avtomobil nömrəsinin sahibi BƏƏ-nin Əbu –Dabi şəhər sakini gənc Səid Abdul Qaffar Horeyidir. Məlumata görə o, “1” rəqəmi olan avtomobil nömrəsini 14 211 032 dollara alıb.
“Bu nömrəni əldə etmək üçün böyük məbləğdə pul ödəməyə hazır idim. Çünki bu, dünyada ən yaxşı nömrədir” – deyə o, bildirib.
Hoyerinin qardaşı da vaxtilə 10 milyon dolarından keçərək üzərində “5” və “7” rəqəmləri yazılmış iki avtomobil nömrəsi əldə etmişdi.
Araşdırmalara əsasən deyə bilər ki, ən bahalı avtomobil nömrələrinin olduğu ölkə Birləşmiş Ərəb Əmirliyidir. Belə ki, dünyada 50 bahalı avtomobil nömrələrindən 37-si bu ölkədədir.
Son şərhlər