“Zəfər” Şəhid Ailələrinə Dəstək İctimai Birliyinin təşəbbüsü ilə Abşeron rayonunun olan şəhid ailələri ilə Türkiyənin şəhid ailələri arasında qardaşlıq və həmrəylik görüşü təşkil edilib. “Türk dünyasının şəhid ailələri arasında əlaqələrin inkişafı” layihəsi çərçivəsində baş tutan tədbirdə hər iki ölkənin şəhid yaxınları, eləcə də Türkiyənin Ailə və Sosial Xidmətlər Nazirliyinin Şəhid Yaxınları və Qazilər Baş İdarəsindən nümayəndələri iştirak ediblər.
Tədbir, Vətən uğrunda canlarını fəda edən şəhidlərin xatirəsinin bir dəqiqəlik sükutla yad edilməsi, ardınca isə Türkiyə Respublikasının İstiqlal Marşı və Azərbaycan Respublikasının Dövlət Himninin səsləndirilməsi ilə başlayıb.
Abşeron Rayon İcra Hakimiyyətinin başçısı Abdin Fərzəliyev tədbirdə etdiyi çıxışında Azərbaycan-Türkiyə münasibətlərinin tarixi dərinliyinə, ölkələr arasında bütün sahələrdə mövcud olan sıx əməkdaşlığa və 44 günlük Vətən Müharibəsində qazanılan şanlı Zəfərə diqqət çəkib.
A.Fərzəliyev xüsusilə, iki xalqın birgə bacarıq və qüdrətinin simvolu kimi, Abşeron rayonunun Digah qəsəbəsində birgə təşəbbüslə inşa edilən “Türk şəhidliyi” abidəsini misal göstərib. Rayon rəhbəri qeyd edib ki, “Bu abidə təkcə memarlıq nümunəsi deyil, eyni zamanda iki qardaş xalqın bölünməz dostluğunun, həmrəyliyinin və şəhidlər qarşısında sonsuz minnətdarlığının əbədi simvoludur. Tarixdə Qafqaz İslam Ordusu Azərbaycan oğulları ilə birgə vuruşaraq düşməni məğlub edib. Bu döyüşlərdə şəhid olan türk əsgərlərindən 9 nəfəri məhz bu torpaqda, Digah qəbiristanlığında dəfn edilib.”
Abşeron RİH-in başçısı Azərbaycan Ordusunun Prezident İlham Əliyevin rəhbərliyi ilə qazandığı tarixi Zəfərdən sonra ərazi bütövlüyünün bərpa olunduğunu, Qarabağa həyatın qayıtdığını və azad edilən ərazilərdə genişmiqyaslı bərpa-işlərin davam etdiyini vurğulayıb. Fərzəliyev həmçinin, rayonunda şəhidlərin xatirəsinin əbədiləşdirilməsi və onların ailələrinə daimi dəstək göstərilməsi istiqamətində görülən işlər haqqında məlumat verib.
“Zəfər” Şəhid Ailələrinə Dəstək İctimai Birliyinin sədri Sevinc Orucova çıxışında təşkilatın həyata keçirdiyi layihələrin əsas məqsədinin şəhid ailələri arasında həmrəylik və qarşılıqlı dəstək ənənəsini gücləndirmək olduğunu diqqətə çatdırıb.
Türkiyə Respublikası Ailə və Sosial Xidmətlər Nazirliyi nəzdində Şəhid Yaxınları və Qazilər Baş İdarəsinin sədr müavini Halit Çağdaş isə çıxışında Azərbaycan və Türkiyənin bir millət, iki dövlət prinsipi üzərində möhkəm birliyini, həmçinin şəhid ailələrinin bu qardaşlığın ən ali rəmzi olduğunu qeyd edib.
Sonra çıxış edən şəhid Elçin Həsənlinin anası, Abşeron RİH yanında İctimai Şuranın sədri Xatirə İsmayılova və Şəhid polis Abdülkadir Güngörün həyat yoldaşı Merve Zarife Güngör həm Türkiyə, həm də Azərbaycanda şəhid ailələrinin dövlətin diqqət və qayğısı ilə əhatə olunduğu, onların sosial müdafiəsi və rifahının gündən-günə daha da yaxşılaşdırılması üçün hər cür dəstəyin göstərildiyini diqqətə çatdıraraq, dövlət başçıları və xanımlarına dərin təşəkkürlərini bildiriblər.
Daha sonra tədbir bədii hissə ilə davam edib. Görüşün sonunda Türkiyədən gələn şəhid ailələrinə Abşeron RİH tərəfindən xatirə hədiyyələri təqdim edilib
Qeyd edək ki, 1-5 sentyabr tarixlərində həyata keçirilən bu layihənin əsas məqsədi Azərbaycan və Türkiyənin ortaq milli-mədəni dəyərlərini təbliğ etmək, şəhid ailələri və ictimaiyyət arasında əməkdaşlıq və dostluq mühitini möhkəmləndirməkdir. “Zəfər” Birliyi keçən il də eyni adlı layihə çərçivəsində Şimali Kipr Türk Respublikasından olan şəhid ailələri ilə görüşlər təşkil etmiş, 2024-cü ilin iyul ayında isə 30 şəhid övladı üçün ŞKTR-da “Yay Məktəbi” təşkil etmişdi.
Son şərhlər