“Azərbaycan İŞİD-ə qarşı koalisiyaya qoşula bilər”

Paris konfransında çıxış edən İraq prezidenti Fuad Masum koalisiya ölkələrini İŞİD-ə qarşı çevik və mütəmadi hava zərbələri endirməyə çağırıb. İraq prezidenti xəbərdarlıq edib ki, dərhal tədbir görülməsə, islamçı yaraqlılar daha böyük əraziləri tutacaq. O, İŞİD-in maliyyə mənbələrini kəsməyə və qanunvericiliklə onların müxtəlif ölkələrdən könüllülər cəlb etməsinin qabağını almağa çağırıb.

Paris konfransından sonra Fransa hərbi hava qüvvələri İŞİD mövqelərini bombalamağa başlayıb. Bu, artıq beynəlxalq koalisiyanın yarandığını təsdiqləyən əlamətdir. ABŞ hökuməti 40 yaxın dövlətin İŞİD-ə qarşı müharibə koalisiyasına qoşulacağını elan edib. Əcəba, bu koalisiyada Azərbaycan da olacaqmı? Türkiyə məlum olduğu kimi Mosul konsulluğu əməkdaşlarının girovluqda olduğunu əsas gətirərək koalisiyada olmaqdan imtina edib. Ancaq ötən şənbə günü girovlar azad edildiyi üçün qonşu ölkə ilə bağlı yeni durum yaranıb.

Azərbaycanın yeni koalisiyaya qoşulub-qoşulmayacağı ilə bağlı hökumət hələ ki susur. Doğrudur, Azərbaycan hökuməti ABŞ daha əvvəl yaratdığı beynəlxalq antiterror koalisiyasında iştirak edib. Ancaq hazırda durum bir az fərqlidir. Üstəlik hələlik Bakıya bu barədə rəsmi təklifion olub-olmadığı da aydın deyil.

Siyasi şərhçi Elxan Şahinoğlunun fikrincə, indi əsas sual Amerikanın Azərbaycanı yeni koalisiyaya dəvət edib-etməməsi ilə bağlıdır. Əgər dəvət olarsa, o zaman bu, yeni situasiya yaradacaq: “Əsas vəzifə Amerikanın Azərbaycana belə bir təklifi etməsidir. Hələlik belə bir xəbər yoxdur. Əgər 40 ölkə qoşulubsa yəqin ki, bizə də belə bir təklif olacaq. Gürcüstana təklif edilib artıq. Çünki ötən həftə ABŞ müdafiə naziri və başqa yüksək hərbi rütbəli şəxslər Gürcüstana səfər edib. Bu mənada əgər qarşıdakı günlərdə Amerikadan Azərbaycana yüksək səviyyəli heyət gəlsə, deməli təklif bizə də olacaq. Bildiyiniz kimi, Azərbaycan Əfqanıstan və İraq koalisiyasında iştirak edib. Bu istiqamətdə təcrübə var”.

E.Şahinoğlu deyir ki, Azərbaycan İŞİD əleyhinə koalisiyaya aktiv üzv kimi olmasa da, qoşulacaq: “İŞİD terrorunun Azərbaycana da təsiri var. Azərbaycan vətəndaşları Suriyada. İraqda İŞİD tərkibində döyüşür. Bundan başqa ölkə daxilinə təsirləri var, dini radikalizm artır. Bu mənada fikrimcə, Azərbaycan hakimiyyətində də İŞİD narahatlığı var, düşünürəm ki, artıq hökumət içində müzakirələr gedir. Ancaq Azərbaycanın koalisiyanın aktiv üzvü kimi hərbi əməliyyatlara qatılacağını, Amerika və Fransa kimi bombardman həyata keçirəcəyini güman etmirəm. Koalisiyada bir aktiv üzvlər, bir də passiv üzvlər olacaq. Fikrimcə, Azərbaycan da təhlükəsizlik, kəşfiyyat sahəsində koalisiya ilə əməkdaşlıq edə bilər”.