Sentyabrın 30-da Tallinndə Azərbaycan ilə Estoniya arasında Ticarət-iqtisadi əməkdaşlıq üzrə 
hökumətlərarası komissiyanın 2-ci iclasında iki ölkə arasında iqtisadi münasibətlərin vəziyyəti və inkişafı müzakirə olunub.
Azərbaycanı iclasda rabitə və yüksək texnologiyalar naziri Əli Abbasovun rəhbərlik etdiyi nümayəndə heyəti təmsil edib. Nümayəndə heyətinin tərkibinə energetika və sənaye nazirinin müavini Natiq Abbasov, vergilər nazirinin müavini Sahib Ələkbərov, Təhsil departamentinin rəhbəri Tamilla Əliyeva, Rabitə və Yüksək Texnologiyalar Nazirliyi yanında Kibertəhlükəsizlik mərkəzinin direktoru Faiq Fərmanov, Yüksək Texnologiyalar Parkının direktoru Seymur Ağayev və başqaları daxil olublar.
Estoniya tərəfdən iclasda iqtisadiyyat və kommunikasiya naziri Urve Palonun rəhbərlik etdiyi komissiya üzvləri iştirak ediblər.
Hökumətlərarası komissiyanın iclasında Estoniya naziri Urve Palo deyib ki, bugünkü görüş əməli xarakter daşıyır və iki ölkə arasında gələcək əməkdaşlıq üçün möhkəm zəmin yaradır.
U.Palo bütövlükdə Estoniya ilə Azərbaycan arasında əməkdaşlıqdan danışarkən qeyd edib ki, əlaqələrin inkişafının ilkin mərhələsində olduğumuza baxmayaraq, əməkdaşlıq potensialı yetərincə genişdir. Bu gün Estoniya ilə Azərbaycan arasında əmtəə mübadiləsi az və qeyri-sabitdir, keçən il bu göstərici 8,1 milyon avro olub.
Urve Palo, onun fikrincə, az həcmdə həyata keçirilmiş qarşılıqlı investisiyalar barədə də məlumat verib.
Eston nazir iki ölkənin işgüzar dairələrinin qarşılıqlı marağının artdığını qeyd edib. Estoniyanın biznes registrinin məlumatına görə, 2014-cü ilin yanvar ayına ölkədə 19 Azərbaycan müəssisəsi qeydə alınıb ki, onun da yarısı 100 faiz Azərbaycan kapitalı ilə fəaliyyət göstərir. Qarşılıqlı faydalı iqtisadi əməkdaşlıq üçün şərait yaradılmasının vacib olduğu bildirilib.
Urve Palo nəzərə çatdırıb ki, Estoniya sadələşdirilmiş transsərhəd ticarəti üzrə dünyada 7-ci yeri tutur.
Eston nazir elmi-tədqiqat və konstruktor araşdırmaları sahəsində əlaqələri möhkəmlətməyin əhəmiyyətini vurğulayaraq deyib ki, yerli sahibkarlara Azərbaycanın Yüksək Texnologiyalar Parkının imkanları barədə məlumat veriləcəkdir.
U.Palonun sözlərinə görə, Estoniya informasiya texnologiyaları sahəsində dövlətlərarası əməkdaşlığın vacib olduğunu bildirir və istər İT-qərarlar, istərsə də kibertəhlükəsizlik sahəsində öz təcrübəsini bölüşməyə hazırdır.
Nazir deyib: İkitərəfli münasibətləri möhkəmləndirmək məqsədilə Estoniya digər beynəlxalq təşkilatlar, ittifaqlar və təsisatlar ilə əməkdaşlıqda Azərbaycanı dəstəkləyir. U.Palo bildirib ki, Estoniya hökuməti Azərbaycan ilə Avropa İttifaqının siyasi birliyini və iqtisadi inteqrasiyasını bundan sonra da dəstəkləməyə hazırdır. U.Palo əməkdaşlığın genişləndirilməsi üçün mümkün zəmin kimi “Şərq tərəfdaşlığı” proqramının əhəmiyyətini vurğulayaraq Azərbaycan ilə Avropa İttifaqı arasında danışıq proseslərinin sürətləndirilməsi üçün səylərin zəruri olduğunu qeyd edib.
Azərbaycanın rabitə və yüksək texnologiyalar naziri Əli Abbasov səmimi qəbul üçün minnətdarlığını bildirərək 2012-ci ilin dekabrında təsdiq olunmuş “Azərbaycan-2020: gələcəyə baxış” inkişaf konsepsiyası barədə məlumat verib və qeyd edib ki, əsas məqsəd bütün göstəricilər üzrə dünyanın ən inkişaf etmiş ölkələri sırasına daxil olmaqdır. Ə.Abbasovun sözlərinə görə, inkişaf konsepsiyasının məqsədi həmçinin qeyri-neft sektorunun hesabına ümumi daxili məhsulun həcmini 2012-ci ildəkinə nisbətən iki dəfə artırmaqdır.
Azərbaycanın rabitə və yüksək texnologiyalar naziri deyib ki, məlum olduğu kimi, Estoniya innovasiyalar sahəsindəki uğurları ilə fəxr edir. Bu sahədə sürətli inkişaf sahibkarlığın inkişaf etdirilməsi üzrə uzunmüddətli və şüurlu fəaliyyət hesabına əldə edilib. Buna görə də Estoniya Azərbaycanın əsas tərəfdaşıdır. Əli Abbasov təhsil, yüksək texnologiyalar sahəsini gələcək əməkdaşlıq üçün prioritet istiqamətlər adlandırıb.
Ə.Abbasov Azərbaycan tərəfinin nəqliyyat sektorunda da əməkdaşlığı inkişaf etdirmək niyyətində olduğunu bildirib. Məlumat verilib ki, Azərbaycan əsasını TRASECA layihəsinin təşkil etdiyi Böyük İpək Yolunun bərpa edilməsinin təşəbbüsçüsüdür.
Qeyd edilib ki, Azərbaycanın və Estoniyanın vergi orqanları arasında səmərəli informasiya mübadiləsi, habelə ikiqat vergitutmadan qaçmaq üçün imzalanmış saziş, Estoniyanın Vergi və Gömrük Departamenti ilə Azərbaycanın Vergilər Nazirliyi arasında əməkdaşlıq haqqında Memorandum iqtisadi əlaqələrin inkişafına kömək göstərir.
Rabitə və yüksək texnologiyalar naziri Azərbaycanın Yüksək Texnologiyalar Parkının fəaliyyəti barədə məlumat verərək bu sahədə ikitərəfli əlaqələrin inkişafı üçün qanunvericilik bazasının yaradılmasını təklif edib. İnformasiya-kommunikasiya texnologiyaları sahəsində iki ölkə arasında ticarətin birlikdə inkişaf etdirilməsi, Azərbaycanda texnoparkların və innovasiya yönümlü iqtisadi mühitin yaradılması sahəsində Estoniyanın 20 illik təcrübəsinin öyrənilməsi təklif olunub.
Əli Abbasov Azərbaycanın ərazi bütövlüyünü müdafiə etdiyinə görə Estoniyaya təşəkkürünü bildirir. Bununla əlaqədar olaraq Azərbaycan tərəfi onun işğal olunmuş ərazilərində, o cümlədən Dağlıq Qarabağ regionunda istehsal edilmiş malların Estoniya bazarına idxalına, ixracına, reklamına və satışına yol verməməyə çağırıb.
Energetika və sənaye nazirinin müavini Natiq Abbasov energetika sahəsində həyata keçiriləcək hər iki ölkə üçün regional və beynəlxalq əhəmiyyətli layihələrdə iştirak imkanlarının öyrənilməsini, texnika və metallurgiya sahəsində iki ölkə arasında münasibətlərin genişləndirilməsini təklif edib.
Vergilər nazirinin müavini Sahib Ələkbərov öz çıxışında 2009-cu ildə imzalanmış “Azərbaycanın Vergilər Nazirliyi ilə Estoniyanın Vergi və Gömrük Departamenti arasında vergi inzibatçılığı fəaliyyəti sahəsində əməkdaşlıq haqqında memorandum” əsasında qabaqcıl təcrübə mübadiləsini davam etdirmək təklifini irəli sürüb.
İclasda komissiyanın üzvləri hər iki ölkənin şirkətlərinin konfranslarda, seminarlarda iştirakını artırmaq, qarşılıqlı ticarəti və investisiyaları genişləndirmək, daha dərin iqtisadi əməkdaşlıq üçün əlverişli şərait yaratmaq məqsədilə gələcəkdə əməkdaşlığın inkişaf etdirilməsinə və intensivləşdirilməsinə maraq göstərdiklərini bildiriblər.
Ticarət-iqtisadi əməkdaşlıq üzrə hökumətlərarası komissiyanın 2-ci iclasının yekunlarına dair protokol imzalanıb. Sənədi rabitə və yüksək texnologiyalar naziri Əli Abbasov, iqtisadiyyat və kommunikasiyalar naziri Urve Palo imzalayıblar.
Son şərhlər