Avstriya parlamenti milli təhlükəsizlik baxımından “WhatsApp” və “Telegram” kimi mesajlaşma proqramlarının monitorinqinə icazə verən qanun layihəsini təsdiqləyib.
Elchi.az xəbər verir ki, Avstriya parlamenti milli təhlükəsizlik baxımından “WhatsApp” və “Telegram” kimi mesajlaşma proqramlarının monitorinqinə icazə verən qanun layihəsini təsdiqləyib.
Milli Məclisdə keçirilən iclasda müvafiq qanun layihəsinin lehinə 105, əleyhinə isə 71 səs verilib.
Qanun layihəsi təhlükəsizlik qüvvələrinə, xüsusilə terror hücumları kimi hallarda, mesajlaşma proqramlarında şübhəli şəxslərin şifrəli və ya şifrəsiz yazışmalarına daxil olmaq hüququ verir.
İcazə 3 ay müddətinə verilsə də, lazım gələrsə, uzadıla bilər.
Daxili işlər naziri Gerhard Karner bu günün Avstriyanın təhlükəsizliyi üçün xüsusi bir gün olduğunu bildirib və polisin terrorçularla “bərabər şərtlərlə” mübarizə apara bilməsi və hücumların qarşısının alınması üçün müvafiq qanun layihəsinin zəruri olduğunu vurğulayıb.
İfrat sağçı müxalif Avstriya Azadlıq Partiyasından (FPÖ) olan millət vəkili Gernot Darmann hökuməti bu addımı ilə əsas hüquq və azadlıqları pozmaqda ittiham edib.
Nuranə Məmmədova
