Avropa Birliyinin (AB) Xarici məsələlər və siyasi təhlükəsizlik üzrə nümayəndəsi Federika Moqerini birliyin üzv dövlətlərinin XİN başçılarının yanvarın 19-da Brüsseldə keçiriləcək iclasının gündəliyinə terrorizmlə mübarizə məsələsini daxil edib.
AB-nin xarici siyasət idarəsindən TASS-a bildirilib ki, müvafiq qərar Parisdə yanvarın 7-də törədilmiş terror aktı ilə bağlı qəbul olunub.
İclas öncəsi Moqerini cümə günü Brüsseldə terrorizmlə mübarizə üzrə avropalı koordinator Jil de Kerşofla görüş keçirəcək.
Xatırladaq ki, yanvarın 7-də Parisdə “Charlie Hebdo” satirik nəşrinin redaksiyasına silahlı hücum olub, nəticədə 12 nəfər ölüb, 11 nəfər yaralanıb. Hadisəni törətməkdə şübhəli bilinən 7 nəfər saxlanılıb.
Fransada üçgünlük matəm elan olunub.(oxu.az)
