Radikal HƏMAS hərəkatının liderləri Qəzza zolağında atəşkəsdən sonra anklavı tərk edərlərsə, Böyük Britaniya iki dövlətli həll üzrə danışıqların başa çatmasını gözləmədən müstəqil Fələstin dövlətini rəsmən tanıya bilər.
Elchi.az xəbər verir ki, bu barədə Böyük Britaniyanın xarici işlər naziri Devid Kemeron Associated Press agentliyinə müsahibəsində bildirib.
Nazir hesab edir ki, bu yolda ilk addım “döyüş əməliyyatlarında fasilədir” və nəticədə “daimi və etibarlı atəşkəsə” çevriləcək. O qeyd edib ki, “Qəzza oktyabrın 7-də [İsrailə hücumu] həyata keçirən insanların nəzarətində olduğu müddətdə münaqişənin iki dövlətli həlli mümkün deyil”.
Kemeronun sözlərinə görə, Fələstinin tanınması “[danışıqlar] prosesinin lap əvvəlində baş verə bilməz, eyni zamanda prosesin sonuna qədər gözləməyə də ehtiyac yoxdur”.
“Biz fələstinlilərə daha yaxşı gələcək, öz dövlətlərinin olduğu bir gələcək perspektivi verməliyik” deyən o, bunun “bölgədə uzunmüddətli sülh və təhlükəsizlik üçün tamamilə zəruri” olduğunu vurğulayıb.
Nuranə Məmmədova
Son şərhlər