Amerikalı jurnalist qətlə yetirildi

Bu günlərdə “The Washington Post ” “əl-Qaidə” terror təşkilatının amerikalı girov Lyuk Somersi edam edəcəyini açıqladı. Qəzet bildirdi ki, 33 yaşlı Amerika vətəndaşının video-müraciəti “əl-Qaidə” tərəfindən İnternetə yerləşdirilib. Somers çıxışında iki ildən çoxdur ki, girov saxlanıldığını deyib: “Köməyə ehtiyacım var. Həyatımın təhlükədə olduğuna əminəm. Azad olunmaq üçün mümkün olan hər şeyin edilməsini istəyirəm. Təşəkkür edirəm”. “Əl-Qaidə” tələblərinin yerinə yetirilməsi üçün ABŞ-a 3 gün vaxt verdiyini bildirib. “The Washington Post” ABŞ-ın bundan əvvəl Somersi azad etmək üçün çalışdığını, amma nəticə əldə edə bilmədiyini yazmışdı. “Əl-Qaidə” ABŞ-a xəbərdarlıq da etmişdi: “Biz Obama və ABŞ hökumətini axmaq hərəkətlərinin nəticələri haqqında xəbərdar edirik”. O da bəlli idi ki, Lyuk Somers 2013-ci ilin sentyabrında Yəmənin Sanə şəhərində girov götürülüb.

Bu məsələ ilə bağlı “Reuters”in son xəbərində deyilir ki,  Amerikanın müdafiə naziri Çak Heygelin bəyan edib ki, “əl-Qaidə” terror təşkilatı amerikalı jurnalist Lyuk Somers və daha bir girovu öldürüb. ABŞ onları girovluqdan xilas etmək üçün Yəməndə hərbi əməliyyat keçirib.

Girovlar da məhz bu əməliyyat zamanı terrorçular tərəfindən öldürülüb. Amerikalı nazir bu şənbə günü belə bir bəyanatla çıxış edib. İstefa versə də, öz vəzifəsini icra edən Çak Heygelin onu da vurğulayıb ki, girovları xilas etmək üçün keçirilmiş hərbi əməliyyat uğursuz olub. Ancaq bizim başqa yolumuz yox idi. Ona görə də bu əməliyyatın keçirilməsini haqlı sayıram.

“Bizi belə bir əməliyyata təşviq edən ciddi səbəblər var idi. Bilirdik ki, cənab Somersin həyatına son dərəcə böyük təhlükə vardı”, amerikalı nazir Kabildə jurnalistlərə bildirib.