Alimlərin proqnozlarına görə, artıq 2026-cı ildə baş verə biləcək və şərti olaraq “X xəstəliyi” adlandırılan yeni qlobal pandemiya ehtimalı yüksəkdir.
Elchi.az xəbər verir ki, bu barədə “Daily Star” xəbər portalı məlumat yayıb.
Nəşrin məlumatına görə, hazırda aktiv şəkildə inkişaf edən və yeni pandemiyaya səbəb ola biləcək dörd virus mövcuddur. Potensial təhlükələr siyahısına bunlar daxildir:
Mpox (meymunçiçəyi) – 2022-ci ildəki yayılmadan sonra virus dünya üzrə möhkəmlənib, dövriyyədə qalmaqda davam edir və yeni növlər formalaşdırır;
Məxmərək (Rubella) – demək olar ki, məğlub edilmiş sayılan bu xəstəlik MMR peyvəndi ilə əhatə səviyyəsinin ciddi şəkildə azalması səbəbilə geri qayıda bilər. Bu artıq qızılca yoluxmalarının artmasına gətirib çıxarıb (son 15 ilin ən aşağı peyvəndlənmə göstəricisi);
Quş qripi (H5N1) – xüsusilə təhlükəli ştamdır, 2020-ci ildən bəri aktiv mutasiya edir və məməliləri yoluxdurmaq qabiliyyəti qazanıb. Alimlər onun insanlar arasında daha effektiv ötürülməyə uyğunlaşa biləcəyindən ehtiyat edirlər;
Oropuşe virusu – xırda həşəratlar vasitəsilə yayılır və yayılma arealı Cənubi Amerikadan Avropaya doğru genişlənir. Simptomları denge qızdırmasına bənzəyir və sürətlə yayılma potensialı kifayət qədər yüksəkdir.
Sauthempton və Qlazqo universitetlərinin tədqiqatçıları da daxil olmaqla ekspertlər vurğulayırlar ki, dünya, xüsusilə Avropa, COVID-19 miqyaslı böhranlara hələ də yetərincə hazır deyil.
Əsas risk amilləri kimi peyvəndlənmə səviyyəsinin ümumilikdə azalması və virusların sürətlə təkamül edərək müxtəlif növlər arasında ötürülmə qabiliyyəti göstərilir.
Məryəm
