Avropa İttifaqı Şurası Rusiya Federasiyasına qarşı 13-cü sanksiyalar paketinin məzmununun təfərrüatlarını açıqladığı bəyanat yayıb. Elchi.az xəbər verir ki, bu barədə RİA Novosti məlumat yayıb.
Sənəddə bildirilir ki, yeni sanksiyalar paketinə 194 fiziki və hüquqi şəxs daxildir. İndi sanksiya siyahısında iki mindən çox adam olacaq.
“Şura daha 106 fiziki və 88 hüquqi şəxs barəsində qətimkan tədbirinin tətbiqi barədə qərar qəbul edib… Ümumilikdə, Ukraynanın ərazi bütövlüyü, suverenliyi və müstəqilliyinə xələl gətirən və ya təhdid edən hərəkətlərə qarşı Aİ-nin məhdudlaşdırıcı tədbirləri hazırda 2000-dən çox fiziki və hüquqi şəxsə tətbiq edilir”, – deyə məlumatda bildirilir.
Bundan əlavə, Rusiya Federasiyasının hərbi sənaye kompleksinə dəstək verdiyi iddia edilən 27 yeni təşkilata sanksiya tətbiq edilib. Qeyd olunur ki, şirkətlərin bəziləri Hindistan, Çin, Serbiya, Qazaxıstan, Tailand, Türkiyə və Şri-Lankada yerləşir. Sənəddə deyilir ki, bizneslər “ticarət məhdudiyyətlərinin aşılmasında” iştirak edirlər.
Havar Şəfiyeva