ABŞ Maliyyə Nazirliyi son 7 ildə İrana qarşı ən böyük sanksiyaları tətbiq edib.
Elchi.az xəbər verir ki, tədbirlər yerli və Rusiya neftini qanunsuz daşıyan kölgə donanmasına qarşı yönəlib.
Qara siyahıya İranın ali dini lideri Ayətullah Əli Xameneinin müşaviri oğlu, neft taciri Hüseyn Şamxaninin nəzarətində olan şəbəkənin bir hissəsi olan 50-dən çox fiziki və hüquqi şəxs və 50-dən çox gəmi daxildir.
ABŞ Maliyyə Nazirliyi bildirib ki, Şamxani böyük tankerlər və konteyner gəmiləri donanmasına nəzarət etmək üçün “atasının korrupsiya və siyasi təsirindən istifadə edir”. “Bu şəbəkə İran və Rusiyadan neft və neft məhsullarını, eləcə də digər yükləri dünya üzrə alıcılara nəql edərək, on milyardlarla dollar gəlir gətirir ki, bu da “rejimin təhlükəli fəaliyyətinin maliyyələşdirilməsinə” gedir”, – departament vurğulayır. Digər firmalar arasında sanksiyalara Dubayda yerləşən Milavous Group, Ocean Leonid Investments və Crios Shipping daxildir.
Bundan əlavə, Xəzinədarlıq Departamenti qeyd edib ki, Şamxani ailəsi bütün dünyada “eksklüziv daşınmaz əmlak” və xarici pasportlar əldə etmək üçün qanunsuz qazanclardan istifadə edir ki, bu da “qara siyahı”ya düşən şəxslərə öz korrupsiya sxemlərini davam etdirmək üçün xaricdə bizneslə məşğul olarkən İranla əlaqələrini gizlətməyə imkan verir.
“Məqsədimiz İranın əsas gəlir mənbəyini məhdudlaşdırmaq, rejimə nüvə təhlükəsini, ballistik raket proqramı və terrorçu qruplara dəstəyini dayandırmaq üçün təzyiq göstərməkdir”, – deyə Maliyyə Nazirinin müavini Maykl Folkender bildirib.
Bir həftə əvvəl Avropa İttifaqı Hüseyn Şamxaniyə qarşı sanksiyalar tətbiq edib. Bunun əsasını onun Rusiya neftinin ticarətindəki rolu və kölgə donanmasının logistikasında iştirakı təşkil edirdi. Onunla yanaşı, onun Dubay şirkətləri Admiral Group və Milavous Group da məhdudiyyətlərə məruz qalıb. “Hüseyn Şamxani Rusiya hökuməti üçün əhəmiyyətli gəlir payı təmin edən iqtisadi sektorda iştirak edir”, – Aİ vurğulayıb.
Şamxaninin Milavous Qrupu Liberiya və Panama bayraqları altında üzən gəmilərin fəaliyyətini koordinasiya edib və gündə 300 min barelə qədər neft sataraq hər il təxminən 400 milyon dollar gəlir əldə edib.
Yeganə
