Ağ Ev, Micron-a ABŞ-da çip istehsalı investisiyası üçün 6,14 milyard dollar maliyyə dəstəyi veriləcəyini açıqlayıb.
Elchi.az xəbər verir ki, Ağ Evdən verilən açıqlamada, CHIPS və Elm Aktı çərçivəsində Micron ilə ABŞ Ticarət Nazirliyi arasında Nyu-Yorkda iki və Aydahoda bir çip fabrikinin tikintisinə dəstək üçün ilkin razılığın əldə edildiyi açıqlanıb.
Açıqlamada, bu çərçivədə 6,14 milyard dollara qədər birbaşa maliyyə təmin ediləcəyi və maliyyələşdirmənin Micronun 20 mindən çox birbaşa məşğulluq yaratmasına töhfə verəcəyi ifadə edildi.
Bu ayın əvvəlində ABŞ-da CHIPS Qanunu çərçivəsində Tayvanda yerləşən yarımkeçirici şirkət TSMC-yə 6,6 milyard dollara qədər birbaşa maliyyələşdirmə və 5 milyard dollara qədər kredit veriləcəyi açıqlandı.
Cənubi Koreya elektronika şirkəti Samsung-un Texasdakı çip istehsalına investisiyası üçün 6,4 milyard dollara qədər birbaşa maliyyə təmin ediləcəyi də bildirilib.
Mart ayında 8,5 milyard dollarlıq qrant, eləcə də Intel-in yerli çip istehsalı müəssisələri üçün 11 milyard dollar kredit ayrılacağı açıqlanıb.
ABŞ administrasiyası həmçinin yarımkeçirici istehsalını artırmaq üçün Global Foundries, Microchip Technology və BAE Systems şirkətlərini dəstəkləyəcəyini bəyan etmişdi.
Şayəstə Hüseynova