Fələstin Prezidenti Mahmud Abbas Qəzzanın Fələstin Dövlətinin ayrılmaz hissəsi olduğunu vurğulayaraq, ədalətli və davamlı sülhün regional və beynəlxalq zərurətə çevrildiyini bildirib.
Elchi.az xəbər verir ki, rəsmi Fələstin xəbər agentliyi WAFA-nın məlumatına görə, Fələstinin BMT-dəki daimi nümayəndəsi Riyad Mənsur 29 noyabr Fələstin Xalqı ilə Beynəlxalq Həmrəylik Günündə Baş Assambleyadakı çıxışında Prezident Abbasın mesajını oxuyub.
Abbas mesajında bütün müvəqqəti tənzimləmələrin Fələstin xalqının öz müqəddəratını təyin etmək hüququ və ərazi bütövlüyü ilə uyğun olmalı olduğunu bildirib.
Abbas İsrailin Qəzzadan tamamilə çıxarılması, ərazinin yenidən qurulması və Fələstin Dövlətinin Qəzzada tam inzibati və təhlükəsizlik məsuliyyətini öz üzərinə götürməsi çağırışını təkrarlayıb.
Abbas Qəzzada baş verən soyqırımı və Şərqi Qüds də daxil olmaqla işğal olunmuş Qərb Şəriyəsindəki qanun pozuntularını vurğulayıb və beynəlxalq ictimaiyyətdə Fələstin Dövlətinin tanınmasına dəstəyin artdığını bildirib. Fələstin Prezidenti bildirib ki, “Qəzza Fələstinin ayrılmaz hissəsidir və ədalətli sülh regional və qlobal zərurətdir”.
Abbas vurğuladı ki, Fələstin ABŞ və regional və beynəlxalq tərəfdaşlarla birlikdə “atəşkəsin daimi olması və işğala son qoyacaq, region ölkələrinə təhlükəsizlik, sabitlik və rifah təmin edəcək ədalətli və hərtərəfli siyasi prosesə başlaması” üçün çalışacaq.
İsrail hökumətindəki ifrat sağçı liderlərin “irqçi və ayrı-seçkilik” ritorikasını rədd edən Abbas, məskunlaşma fəaliyyətlərinin, evlərin sökülməsinin, torpaqların ələ keçirilməsinin və şəhər basqınlarının “qanunsuz, birtərəfli və sülhü pozan addımlar” olduğunu söylədi.
BMT-ni bu təcrübələri dayandırmağa və Fələstin xalqını qorumaq üçün öz vəzifələrini yerinə yetirməyə çağıran Abbas, 1967-ci il sərhədlərinə əsaslanan, paytaxtı Şərqi Qüds olan müstəqil Fələstin Dövlətinin yaradılmasının sülhə aparan yeganə yol olduğunu vurğulayıb.
Şayəstə
