Abbas Abbasov fəallaşıb – çevrilişə hazırlaşır

AzNews.az-ın əldə etdiyi məlumata görə, Abbasov təşkilatda mövqelərini gücləndirmək, “AzərRos”un yalnız onun diktəsi ilə fəaliyyət göstərməsinə nail olmaq üçün rəhbər postunda dəyişiklik etmək istəyir. Bunun üçün baş nazirin keçmiş müavini oktyabrın 17-nə qurumun fövqəladə toplantısını çağırıb.

Bildirilir ki, Abbasov iclasda Asif Məhərrəmovun təşkilatın prezidenti postundan çıxarılması məsələsini qaldıracaq.

“AzərRos”dan verilən məlumata görə, bu planın baş tutması qurumun gələcək fəaliyyətini sual altında qoyur. Çünki Asif Məhərrəmovun nüfuzu kifayət qədər çoxdur və qurumun funksionerlərinin onu dəstəkləyəcəyi gözlənilir. Amma bir məsələ də bəllidir ki, Abbasov niyyətinə nail olacağına əmin olmasa, belə bir toplantını çağırmazdı. Qeyd olunur ki, Abbas Abbasov Asif Məhərrəmov vəzifəsindən kənarlaşdırıb, həmin posta öz adamını gətirə biləcəyi halda, təşkilatda ciddi çaxnaşmanın baş verəcəyi və parçalanmanın olacağı qaçılmazdır.

Qeyd edək ki, Asif Məhərrəmov “AzərRos”un prezidenti postuna qurumun 25 yanvar 2013-cü ildə keçirilən V qurultayında seçilib. Bu qurultayda “AzərRos”un əsas idarəedici orqanı olan Ağsaqqallar Şurası təsis edilib. A. Abbasov Ağsaqqallar Şurasının sədri seçilib”.

Bu xəbərdən ortaya çıxan bir məqama –  cənab Abbasovun yenidən fəallaşmasına diqqət edək. Bu, o zamana təsadüf edir ki, A. Abbasovun Bakıda nüfuz edə biləcəyi bir sıra qırımlar da qəfil bir fəallıq nümayiş etdirməyə başlayıblar. Üstəlik, Rusiyanın Azərbaycan və regionla bağlı iddiaları ciddi şəkildə yüksəlişdədir. Putin Rusiyası Avrasiya və Gömrük İttifaqlarının gələcəyini və ümumiyyətlə taleyini Azərbaycanın bu qurumlara münasibəti ilə əlaqələndirib.

Bu da o deməkdir ki, Kreml Azərbaycana təzyiq və təhdidlərini artıracaq; ya da artıq görünməz xətlərlə artırmaqdadır. Xatırlayırsınızsa, ötən ilin son aylarına qədər, düz iki il davam edən bir təzyiq məhz Abbas Abbasovun rəhbərliyində qurulan bir xəyanət təşkilatı ilə Azərbaycana doğru istiqamətlənmişdi. Kreml onun əli ilə Moskvada “Milyarderlər ittifaqı” deyilən bir təsisat yatardı; sonra onun Azərbaycan uzantısını formalaşdırdı; ölkəmizə və ona rəhbərlik edənlərə ciddi təhdid rıçağı əldə etdi və nəticədə… Azərbaycan iqtidarına təhdid ünsürü oluşduran Kreml yekunda ölkəmizdən milyardlarla dəyəri olan layihələr və xəraclar aldı; pərdəarxasındakı oyunlar üçün münbit şərait əldə etdi; siyasi səhnədə öz təşkilatını qurub, konservləşdirdi. O zaman istədiyini əldə edən Rusiya Abbas Abbasovu da konservləşdirdi; “tormoz” basıldı və buna görə də rəsmi Bakıya təhdidlər, təhqirlər yağdıran Abbas müəllim birdən-birə yumşaldı; “layt” bəyanlarda bulundu; kövrəldi, ağladı…

Azərbaycan iqtidarı ona və ölkəyə bu qədər pisliklər edən birisinin Bakı şaxələrini kəsmək, təmizləmək istədi. Lakin bir nöqtədən sonra durdu. Hətta onun deputat oğluna toxunmadı; biznes imperiyasını dağıtmadı. Məsələ məlum idi –  Abbasovların arxasında Rusiya durmuşdu və qoruyurdu. Abbas Abbasovun istifadə müddəti bitməmişdi; lazım olacaqdı. O, hələ Rusiyaya xidmət, vətəninə isə xəyanət etmək potensialı daşıyırdı.

Budur, onu yenidən dövriyyəyə soxublar. Bu gündən başlayaraq, yenidən siyasi səhnəyə dönüşünü təşkil etmək istəyirlər. Hansısa yollarla Bakıda qurduqları məlum təşkilatla əlaqəsini saxlayan Abbasov ölkəmizdəki uzantılarını da hərəkətə keçirib.

Məsələ məlumdur. Xoşluqla mümkün olmasa, məcbur etməklə Azərbaycanı Avrasiya İttifaqına və Gömrük Birliyinə üzv etməyə çalışacaqlar. Üstəlik, gələn il ölkəmizdə parlament seçkiləridir. 2013-də konservləşdirdikləri gizli Rusiya qüvvələrini 2015-də yenidən siyasi səhnədə fəallaşdıracaqlar.