Ukraynanın İlon Maskın “SpaceX” şirkətinə məxsus “Starlink” şəbəkəsinin hərbi analoqu olan “Starshield” peyk sisteminə çıxış üzrə ABŞ hökuməti ilə bağladığı müqavilənin müddəti 2027-ci ilin ortalarında başa çatır.
Elchi.az xəbər verir ki, bu barədə “Reuters” agentliyi məlumat yayıb.
Ukraynanın Vaşinqtondakı müvəqqəti işlər vəkili Denis Senik yeni saziş üzrə danışıqlara dərhal başlamağın zəruri olduğunu bildirib. Diplomat vurğulayıb ki, Kiyev prosesin necə davam edəcəyi və şərtlərin nə olacağı barədə aydınlıq əldə etmək istəyir, çünki bu cür razılaşmaların əldə olunması vaxt tələb edir.
Müqavilənin uzadılması məsələsi oktyabr ayında “Starshield”in fəaliyyətinə tətbiq edilən məhdudiyyətlərdən sonra daha da aktuallaşıb. Terminal sürət həddinin qəfil endirilməsi Ukrayna hərbçilərinin Rusiyaya məxsus zərbə dronlarını zərərsizləşdirməsini çətinləşdirmiş və bəzi əməliyyatların təxirə salınmasına səbəb olmuşdu. Senikin sözlərinə görə, nə Vaşinqton, nə də “SpaceX” tərəfi bu məhdudiyyətlərin səbəbi ilə bağlı Kiyevə hələ də rəsmi izahat verməyib.
Şayəstə
