“Cığır” mənəvi dəyərlərin inkişafına dəstək ictimai birliyinin QHT-lərə Dövlət Dəstəyi Agentliyinin elan etdiyi qrant müsabiqədə qalibi olduğu “Maarif Cığırı – Nizami 885” layihəsi çərçivəsində Birliyin qeydiyyatında olan ata himayəsindən məhrum məktəblilərlə tədbir proqramları həyata keçirilib.
Tədbirlər uşaqların Nizami Gəncəvi əsərlərindəki əsas mənəvi və əxlaqi dəyərləri haqqında düşünməsi üçün müxtəlif fəaliyyətlərlə yadda qalıb. Belə ki, hər qrupda 15-20 nəfər məktəbli olan 5 fərqli qrupla birlikdə Nizami Gəncəvinin “Xeyir və Şər”, “Sultan Səncər və qarı” kimi əsərləri əsasında mütaliə, səhnəcik, forum teatr təşkil olunub. Uşaqlar hekayələri müasir dövrə uyğunlaşdıraraq səhnələşdiriblər və obrazları rollu oyun vasitəsilə canlandırıblar. Bu fəaliyyət uşaqlara yalnız əsərlərin məzmununu daha yaxşı anlamağa deyil, həm də öz fikirlərini ifadə etməyə, əsərdə çatdırılan dəyərləri qavramağa, yaradıcılıqlarını nümayiş etdirməyə imkan verib. Eyni zamanda layihənin təlimçisi Yeganə Mirzəyeva analarla Nizami Gəncəvinin əsərlərində əks olunan mənəvi və əxlaqi dəyərlər haqqında söhbətlər apararaq, bu dəyərlərin müasir həyatda əhəmiyyəti barədə fikirlərini onlarla bölüşüb. Görüşlər uşaqlara layihə çərçivəsində çap olunmuş, hər səhifəsində Nizami Gəncəvi əsərlərindən beytlər qeyd olunmuş bloknot və stikerlərin hədiyyə edilməsi ilə başa çatıb . Layihəyə göstərdiyi maliyyə dəstəyi üçün QHT-lərə Dövlət Dəstəyi Agentliyinə Birliyimiz adından təşəkkür edirik.
