İran Prezidenti Məsud Pezeşkian bəyan edib ki, İran ABŞ ilə müharibə istəmir və danışıqlar yolu ilə razılığa gəlməyə hazırdır.
Elchi.az xəbər verir ki, Pezeşkian BMT Baş Assambleyasının 81-ci sessiyasının açılış həftəsində keçiriləcək görüşlərdə iştirak etmək üçün getdiyi Nyu-Yorkda “Fox News”un suallarını cavablandırıb.
İranın müharibəyə, yoxsa razılaşmaya üstünlük verdiyi soruşulduqda Pezeşkian belə cavab verib: “Biz müharibəni seçmirik; müharibə bizə məcburi şəkildə qəbul etdirilib; biz müharibə axtarışında deyilik”.
Pezeşkian Tehranın Vaşinqtonla razılaşma istiqamətində irəliləməyə hazır olduğunu vurğulayıb və iyun ayında əldə edilmiş, lakin Hörmüz boğazı ilə bağlı mübahisələr səbəbindən pozulmuş, əvvəlcə isə 60 gün ərzində yekun sülh sazişinin imzalanmasını nəzərdə tutan razılaşmaya istinad edib.
İki ölkə arasında davam edən gərginlik fonunda barışdırıcı bəyanatlar verən İran Prezidenti əlavə edib: “Biz sizin prezidentinizlə (Donald Tramp) razılığa gəlmişdik. Buna əsasən, biz irəliləməyə hazırıq və hələ də bunu istəyirik”.
Pezeşkian bildirib ki, müharibəyə son qoyub-qoymamaqla bağlı seçim ABŞ-dan asılıdır.
İranın beynəlxalq hüquq və Nüvə Silahlarının Yayılmaması Müqaviləsi (NPT) çərçivəsindəki öhdəliklərinə əməl edəcəyini qeyd edən Pezeşkian Yəməndəki husilər məsələsinə toxunaraq deyib: “Husilər öz hərəkətlərinə görə məsuldurlar. Onlar bizdən əmr almırlar”. Pezeşkian həmçinin qeyd edib ki, təxminən bir ay əvvəl — sağlığı ilə bağlı müxtəlif şayiələr dolaşan — İran lideri Müctəba Xamenei ilə “şəxsən” görüşüb, onunla təxminən yeddi saat vaxt keçirib və səhhətinin “əla” olduğunu müşahidə edib.
Şayəstə
