Cənubi Koreya Hörmüz boğazına qoşun göndərməyəcəyini açıqlayıb. Prezident Li Çe-myun bildirib ki, ölkə öz xalqının və vətəndaşlarının maraqlarını qoruyacaq olsa da, xarici münaqişəyə cəlb olunmamaq üçün bölgəyə heç bir qoşun yerləşdirilməyəcək.
Elchi.az xəbər verir ki, “Yonhap” agentliyinin məlumatına görə, Li Hörmüz boğazı ilə bağlı keçirilən mətbuat konfransında deyib: “Aydın şəkildə bildirək: münaqişəyə cəlb olunmağa səbəb ola biləcək heç bir qoşun yerləşdirilməsi həyata keçirilməyəcək. Biz müharibəyə girməyəcəyik və ya onda iştirak etməyəcəyik”.
Müharibəyə cəlb olunmamağın indiyədək onlar üçün əsas prinsip olduğunu vurğulayan Li, bu siyasətə sadiq qalmağa davam edəcəklərini qeyd edib.
Li bildirib ki, digər ölkələr kimi, onlar da Hörmüz boğazında öz vətəndaşlarını, gəmilərini və xam neft daşınması marşrutlarını qorumaq üçün əllərindən gələni edəcəklər.
Şimali Koreya ilə ABŞ arasında mümkün sammit
ABŞ Prezidenti Donald Tramp və Şimali Koreya lideri Kim Çen In arasında mümkün sammitlə bağlı sualı cavablandıran Li, “Bu ehtimal şübhəsiz ki, çətin olsa da, istisna edilə bilməz” deyib və əlavə edib ki, belə bir hadisənin baş vermə ehtimalını qəti şəkildə müəyyən edə bilməz.
“Bu ehtimalı reallığa çevirmək üçün əlimizdən gələni etməli olduğumuz aydındır” deyən Li vurğulayıb ki, ABŞ və Şimali Koreya arasında dialoqun bərpası sülh və sabitliyin təmin edilməsi, eləcə də Koreya yarımadasında münasibətlərin yaxşılaşdırılması istiqamətində mühüm addım olacaq.
Şayəstə
