Amerikanın “Uber” şirkəti Böyük Britaniyanın “Wayve” startapı ilə birgə ilk dəfə Londonda sərnişinləri sürücüsüz robotaksilərdə daşımağa başlayacaq.
Elchi.az xəbər verir ki, sınaqların ilk mərhələsində 15 avtomobil iştirak edəcək. Həmin nəqliyyat vasitələrini bu həftədən etibarən sifariş etmək mümkün olacaq.
Hələlik bütün robotaksilərdə zərurət yarandıqda idarəetməni öz üzərinə götürə biləcək operator-sürücü mütləq şəkildə əyləşəcək. Əgər sürücüsüz avtomobillərdən biri əlçatan olarsa, “Uber” tətbiqi sifariş zamanı müştəriyə belə bir maşından istifadə etmək istəyib-istəmədiyini soruşacaq. İmtina edildiyi təqdirdə isə ünvana adət olunmuş sürücülü taksi göndəriləcək, — deyə “The New York Times” xəbər verir.
“Wayve” şirkətinin baş direktoru Aleks Kendall Britaniya hakimiyyətinin bu texnologiyanın London yollarında daha geniş tətbiqinə nə vaxt icazə verəcəyi ilə bağlı təxmini müddət açıqlamaqdan imtina edib. Qəzetin istinad etdiyi analitiklərin fikrincə, bu, ən erkən 2027 və ya hətta 2028-ci ildə baş tutacaq.
Məryəm
