“Qarabağ”ın futbolçusu Kadi Borqes 1 oyunu şərti olmaqla 3 oyunluq cəzalanıb.
Elchi.az xəbər verir ki, bu barədə AFFA İntizam Komitəsinin iclasında qərar qəbul olunub.
Braziliyalı futbolçu Azərbaycan Premyer Liqasının III turunda baş tutan “Sumqayıt” – “Qarabağ” qarşılaşmasının 31-ci dəqiqəsində təcavüzkar davranışa görə birbaşa qırmızı vərəqə aldığı üçün 1 oyunu şərti olmaqla 3 oyunluq cəzalanıb. Bununla yanaşı Ağdam təmsilçisi 3 000 manat cərimə olunub. Yarımmüdafiəçiyə 6 ay sınaq müddəti təyin edilib.
Həmçinin sözügedən oyunda azarkeşlərin rəqib komandanın ünvanına kütləvi şəkildə təhqiramiz ifadələr səsləndirməsinə görə “Sumqayıt” klubu 5 000 manat cərimələnib.
Bundan başqa, III turun “Zirə” – “Neftçi” matçının 70-ci dəqiqəsində ikinci sarı vərəqədən sonra cəzalanan “Neftçi”nin futbolçusu Elvin Bədəlov 1 oyunluq cəzaya məruz qalıb, paytaxt klubu isə 500 manat cərimələnib. Həmin görüşün 80-ci dəqiqəsində azarkeşlərin meydançaya kənar əşya atması səbəbindən “Neftçi” daha 2 000 manat cərimə edilib.
