Beynəlxalq Valyuta Fondu (BVF) 2026-cı ilin yekununda qlobal ÜDM-in 3%, 2027-ci ildə isə 3,4% artacağını proqnozlaşdırır.
Elchi.az xəbər verir ki, bu barədə qurumun dünya iqtisadiyyatının inkişaf perspektivlərinə dair hesabatında bildirilir.
Sənədə əsasən, qlobal iqtisadi artım üzrə proqnoz apreldə təqdim edilən nikbin ssenari ilə müqayisədə 0,1 faiz bəndi azaldılıb. 2027-ci il üzrə proqnoz isə 0,2 faiz bəndi artırılıb.
Fondun analitikləri qeyd edib ki, qlobal ÜDM artımının mülayim zəifləməsi Yaxın Şərqdəki müharibənin təsiri ilə bağlıdır.
“Qlobal iqtisadi artımla bağlı risklər aprel ayı ilə müqayisədə daha balanslı görünsə də, hələ də aşağı yönlü olaraq qalır. Əsas risklərdən biri Yaxın Şərqdə münaqişənin yenidən alovlanması ehtimalıdır. Bu isə xammal qiymətlərində uzunmüddətli dəyişkənliyə, tədarük zəncirlərində yeni fasilələrə, qiymət artımına və maliyyə şərtlərinin sərtləşməsinə səbəb ola bilər.
Geosiyasi gərginliyin yenidən artması iqtisadi artıma mənfi təsir göstərə və inflyasiya təzyiqlərini gücləndirə bilər. Eyni zamanda, Hörmüz boğazında gəmiçiliyin gözləniləndən daha sürətlə bərpa olunması və xammal qiymətlərinin proqnozlaşdırılandan daha aşağı səviyyəyə enməsi iqtisadi artımı sürətləndirə və inflyasiyanı azalda bilər”.
