“Heyvandarlıq sahəsində tətbiq olunacaq subsidiya mexanizmlərinin böyük əksəriyyəti yenidir”.
Elchi.az xəbər verir ki, bunu Milli Məclisin Aqrar siyasət komitəsində keçirilən “Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı”nda irəli gələn vəzifələr barədə ictimai dinləmədə Aqrar Tədqiqatlar Mərkəzinin direktoru Rəşad Hüseynov deyib.
O qeyd edib ki, bu çərçivədə kəsimxanalarda kəsilən heyvanlara məhsul subsidiyasının tətbiqi, emala cəlb olunan südə məhsul subsidiyası, müddətli vergi və gömrük güzəştləri nəzərdə tutulur: “Belə ki, süd üzrə özünütəminetmə səviyyəsinin 81 faizdən 94 faizə, mal əti üzrə isə 83,7 faizdən 100 faizə çatdırılması hədəflənir”.
Mərkəz direktoru qeyd edib ki, 2030-cu ilədək qoyunçuluq sektorunda istehsal həcminin təxminən 9 faiz artırılması nəzərədə tutulur: “Bu isə öz növbəsində özünütəminetmə səviyyəsinin 94,2 faizdən 100 %-ə çatdırılmasına imkan yaradacaq. Bu istiqamətdə yeni intensiv qoyunçuluq təsərrüfatlarının yaradılması üçün dəstək mexanizmləri tətbiq olunacaq. Burada təsərrüfatların qurulması, avadanlıqların alınması və infrastruktur təminatı üzrə subsidiya və güzəştli mexanizmlər nəzərdə tutulur. Paralel olaraq yun və dəri məhsullarına məhsul subsidiyasının tətbiqi planlaşdırılır. Bu da ölkə üçün yeni yanaşmalardan biridir. Eyni zamanda yem təminatının yaxşılaşdırılması məqsədilə 480 min hektar örüş və otlaq sahələrinin bərpası təşviq ediləcək və bu sahələr üzrə subsidiyaların ayrılması düşünülür”.
