Mədəniyyət Nazirliyinin maliyyə dəstəyi ilə icra olunan “Cığır” Mənəvi Dəyərlərin İnkişafına Dəstək İctimai Birliyinin “Milli-Mənəvi Dəyərlər və Mədəni İrsin Təbliği” layihəsi uğurla icra olunub.
Layihə çərçivəsində A və B qrupları üzrə ümumilikdə 40 nəfər iştirakçının cəlb olunduğu iki hissədən ibarət təlimlər təşkil edilib. ‘Milli-mənəvi dəyərlərin qorunması və ötürülməsi’ mövzusuna həsr olunmuş ilk təlim birliyin təsisçisi, Bakı Dövlət Universitetinin Şərqşünaslıq fakültəsinin İslamşünaslıq Elmi-Tədqiqat Mərkəzinin (ETM) aparıcı elmi işçisi, filologiya üzrə fəlsəfə doktoru Yeganə Mirzəyeva tərəfindən həyata keçirilib. İkinci təlimdə isə birliyin Strateji Təhlil və Planlaşdırma Şöbəsinin rəhbəri, Azərbaycan Dövlət Memarlıq və İnşaat Universitetinin müəllimi Elbəy Əliyev tərəfindən “Mədəni irsin fərdin və cəmiyyətin dərkində rolu” mövzusunda maarifləndirici görüş keçirilib. Nəzəri təlimlərin davamı olaraq, iştirakçıların qazanılan bilikləri əyani şəkildə mənimsəməsi üçün Şəki şəhərinə və İsmayıllı rayonuna regional ekskursiyalar təşkil edilib. Şəki səfəri zamanı iştirakçılar ilk olaraq “Süsən” kəlağayı evi və Kəlağayı Muzeyi ilə tanış olublar.
Burada kəlağayı irsinin tarixi, Azərbaycan mədəniyyətindəki rolu və naxışların simvolik mənaları barədə ətraflı məlumat alan layihə üzvləri, yerli ustaların rəhbərliyi ilə ənənəvi texnikadan istifadə edərək kəlağayı bəzəmə, həmçinin naxışların tətbiqi və rənglərin hazırlanması prosesində yaxından iştirak ediblər. Eyni zamanda onlara Şəki ipəkçilik ənənələri, kəlağayı istehsalı, eləcə də ipək və boyaq materiallarının hazırlanma texnologiyası nümayiş etdirilib. Bölgə sənətkarlığının digər sahələrini də əhatə edən səfər çərçivəsində Şəki şəhərinin mədəniyyətinə aid olan dulusçuluq sənətinin yaranma tarixi haqqında yerli ustalar tərəfindən məlumat verilib və master-klass keçirilib. Ardınca Şəki şəhərinin tarixi yerlərinə– “Xan sarayı”, “Karvansaray”, həmçinin digər abidə və muzeylərə ekskursiya edilib. Bu gəzinti zamanı təlimçi Elbəy Əliyev iştirakçıları şəbəkə sənəti haqqında məlumatlandıraraq, şəbəkənin memarlıqda rolu, Şəki evlərinin estetik üslubundakı yeri və şəbəkə ornamentlərinin simvolik mənaları haqqında maarifləndirib. O, həmçinin iştirakçılara mədəni irsin əhəmiyyəti və milli kimliyin inşasında rolu ilə bağlı təlim keçib. Regional proqramın növbəti mərhələsində Bakıdan olan layihə iştirakçıları ilə birlikdə İsmayıllı rayonunun zəngin mədəni və tarixi irsə malik iki qədim qəsəbəsinə – Lahıc və Basqala səfər təşkil olunub. Lahıc qəsəbəsində iştirakçılar “Lahıc” Dövlət Tarix-Mədəniyyət Qoruğunda UNESCO-nun Qeyri-Maddi Mədəni İrs siyahısında yer alan misgərlik sənəti ilə yaxından tanış olub, sənətkar emalatxanalarına baxış keçiriblər və qədim məhəllələrin mədəni atmosferini müşahidə ediblər. Bu prosesdə qoruğun direktoru Maqsud bəyin verdiyi nəzəri məlumatlandırma da iştirakçılar üçün özünəxas maarifləndirici rol oynayıb. Daha sonra qəsəbədə təlimçimiz Yeganə Mirzəyeva tərəfindən “Təndir çörəyinin hazırlanması prosesinin insanın kamillik yolu ilə əlaqələndirilməsi” mövzusunda interaktiv və maraqlı bir təlim keçirilib. Günün ikinci yarısında iştirakçılar Basqal qəsəbəsində qədim ipəkçilik ənənələri və kəlağayı istehsalı prosesi ilə yaxından tanış olublar. Səfər zamanı “Basqal” Dövlət Tarix-Mədəniyyət Qoruğunun direktoru Ceyhun İsmayılovun Azərbaycan çayı, eləcə də çay mədəniyyəti haqqında etdiyi xüsusi məlumatlandırma iştirakçılarda böyük maraq oyadıb. Ardınca isə Yeganə Mirzəyeva tərəfindən iştirakçılar üçün proqramın növbəti təlimi reallaşdırılıb. Bölgələrlə yanaşı, layihə proqramı çərçivəsində iştirakçıların dünyagörüşünün artırılması məqsədilə paytaxt və ətraf ərazilərdə yerləşən Qobustan Milli Tarix-Bədii Qoruğuna, Palçıq Vulkanları Turizm Kompleksinə, həmçinin Bakının qədim tarixini yaşadan Mərdəkan kəndinə də ekskursiyalar təşkil edilib. Layihə çərçivəsində təlimçimiz Yeganə xanım tərəfindən milli məişət mədəniyyətimizin əsas qollarından olan aş və çay dəmlənməsinin fəlsəfi mahiyyətini əks etdirən xüsusi mövzularda təlimlər reallaşdırılıb. Xüsusilə qeyd etmək istəyirik ki, layihə çərçivəsində Bakı şəhərinin Elxan Misirxanov adına 71 nömrəli, A. Hüseynzadə adına 20 nömrəli və Firuz Bayramov adına 22 nömrəli tam orta məktəblərində şagirdlər üçün “Milli-mənəvi dəyərlər və mədəni irsin qorunması” mövzusunda geniş maarifləndirici seminarlar da keçirilib. Birliyimiz adından gənclərin maariflənməsinə yönələn bütün bu fəaliyyətlərin keçirilməsinə lazımi şərait yaratdıqları və göstərdikləri dəstək üçün Azərbaycan Respublikası Mədəniyyət Nazirliyinə, Elm və Təhsil Nazirliyinə və sözügedən məktəblərin rəhbərliklərinə, Dövlət Turzim Agentliyi İsmayıllı Regional Turizm İdarəsinin rəisi Günay Rzayevaya və xoş qarşılama üçün qoruq direktorlarına öz dərin təşəkkürümüzü bildiririk.
