Soydaşlarımız Heydər Əliyevin 103-cü ildönümünü silsilə tədbirlərlə qeyd etdilər

Dünya azərbaycanlıları hər il olduğu kimi bu il də xalqımızın Ümummilli Lideri, müstəqil Azərbaycanın banisi Heydər Əliyevin anadan olmasınının ildönümünü böyük ehtiram və dərin minnətdarlıqla yad ediblər.

Bu barədə Elchi.az-a Diasporla İş üzrə Dövlət Komitəsidən məlumat verilib.

ABŞ, Almaniya, Danimarka, Əlcəzair, Fransa, Gürcüstan, Kanada, İspaniya, İsveç, Qazaxıstan, Misir, Moldova, Niderland, Rusiya, Türkiyə, Ukrayna və digər ölkələrdə yaşayan soydaşlarımız Ulu Öndərin 103-cü ildönümü münasibətilə silsilə tədbirlər keçiriblər. İdman yarışları, guşələr, açıq dərslər, konsertlər və məlumatlandırıcı aksiyalar vasitəsilə dahi şəxsiyyət Heydər Əliyevin əziz xatirəsinə dərin ehtiramlarını ifadə ediblər.

Azərbaycan Respublikasının Diasporla İş üzrə Dövlət Komitəsinin və onun tabeliyindəki Azərbaycan Diasporuna Dəstək Fondunun dəstəyi ilə keçirilən tədbirlərdə Ümummilli Lider Heydər Əliyevin Azərbaycan dövlətçiliyinin möhkəmlənməsində, ölkənin beynəlxalq nüfuzunun artmasında və müasir Azərbaycanın inkişaf strategiyasının müəyyənləşdirilməsində misilsiz xidmətlərindən danışılıb.

Tədbirlərdə müstəqil Azərbaycan dövlətinin qurucusu Heydər Əliyevin ölkəmizin inkişafındakı müstəsna rolundan, Azərbaycanın mədəni irsinin qorunmasına və Türk dünyasında həmrəyliyin gücləndirilməsinə verdiyi töhfələrdən geniş bəhs olunub. Ümummilli Liderin uzaqgörənliyi sayəsində Azərbaycanda sabitliyin bərpa olunduğu, dövlət institutlarının gücləndirildiyi və ölkəmizin gələcək inkişafının təməlinin qoyulduğu xatırladılıb. Eyni zamanda, onun zəngin siyasi təcrübəsi və yüksək idarəçilik bacarığı nəticəsində Azərbaycanın beynəlxalq aləmdə böyük nüfuz qazandığı diqqətə çatdırılıb. Bildirilib ki, görkəmli dövlət xadiminin siyasi irsi bu gün də Azərbaycanın inkişaf yoluna işıq saçır və onun yaratdığı dövlətçilik prinsipləri uğurla davam etdirilir.

Məsələn, ABŞ-nin Nyu York ştatında xalqımızın Ümummilli Lideri Heydər Əliyevin anadan olmasının 103-cü ildönümü münasibətilə təşkil olunan “Prezident kuboku” (“President Cup”) şahmat turnirində Ulu Öndərin Azərbaycanda şahmatın inkişafındakı misilsiz xidmətlərindən danışılıb. Eyni zamanda, Barlebendə keçirilən idman festivalının əsas məramını Heydər Əliyevin uşaqlara, gənclərə və ailə dəyərlərinə verdiyi yüksək önəm təşkil edib. Bu yanaşmalar tədbirlərin ruhuna sirayət edib və xüsusi rəğbətlə qarşılanıb.

Tədbirlərin bədii hissəsində tanınmış musiqiçilərin ifasında Azərbaycan və Avropa bəstəkarlarının əsərlərindən seçilmiş parçalar böyük maraq və heyranlıqla dinlənilib. Dünyanın müxtəlif ölkələrində böyüyən azərbaycanlı uşaqlar isə Vətənə, Azərbaycana və Ulu Öndər Heydər Əliyevə olan dərin sevgilərini şeirlərlə ifadə ediblər. Həmçinin, Ümummilli Liderin zəngin həyat yolu, müstəqil Azərbaycan dövlətinin qurulması və inkişafı naminə həyata keçirdiyi tarixi xidmətlər və gələcək nəsillərə miras qoyduğu dəyərlərdən bəhs edən filmlər iştirakçıların Ulu Öndərlə bağlı dolğun informasiya əldə etməsinə imkan yaradıb.

Soydaşlarımızın fəal iştirakı ilə keçirilən tədbirlər bir daha sübut edir ki, Ümummilli Lider Heydər Əliyevin ideyaları bütün dünya azərbaycanlıları üçün bir vəhdət simvoludur. Onun uzaqgörən siyasəti və vətənpərvərliyi nəticəsində Azərbaycan diasporunun möhkəm təməli formalaşdırılıb.
Məlumat üçün bildirək ki, Ümummilli Lider Heydər Əliyevin 103-cü idönümünə həsr olunan tədbirlərin təşkilində ABŞ-nin Nyu York ştatındakı “Chess Father” şirkəti, Almaniyanın paytaxtı Berlindəki Azərbaycan Evi, Ştutqart Azərbaycan Evi, Almaniya Azərbaycanlıları Alyansı, Maqdeburqdakı Heydər Əliyev adına Dünya Boks Komitəsi, Diaspor Boks Liqası, Danimarka Azərbaycan Evi, Əlcəzairdəki diaspor nümayəndələri, Fransa Azərbaycanlıları Koordinasiya Şurası, Fransa-Azərbaycan Dialoqu Assosiasiyası, Kanadadakı “Vətən” Azərbaycan İncəsənət və Mədəniyyət Mərkəzi, “ElTV Production”, İspaniyadakı Barselona Azərbaycan Evi, İsveçdəki “Qobustan” Azərbaycan Ziyalıları Cəmiyyəti, Qazaxıstanın Aktau şəhərində Ş.Yessenov adına Xəzər Dövlət Texnologiya və Mühəndislik Universitetinin nəzdindəki Azərbaycan Mərkəzi, Misir Azərbaycan Dostluq Cəmiyyəti, Moldova Azərbaycanlıları Konqresi, Benilüks Azərbaycanlıları Koordinasiya Şurası, Rusiyanın “Sankt-Peterburq və Leninqrad vilayətinin Azərbaycan milli-mədəni muxtariyyəti” Regional ictimai təşkilatı, Volqoqrad şəhərindəki soydaşlarımız, Krasnoyarsk diyarının Regional Azərbaycan Milli-Mədəni Muxtariyyəti İctimai Təşkilatının, Türkiyə Azərbaycan Dərnəkləri Federasiyasının, Türkiyənin İğdır şəhərindəki Heydər Əliyev adına liseyin, Türkiyə-Azərbaycan Dostluq Cəmiyyətləri Federasiyasının (TADDEF) “İğdır Azərbaycan Evi” Dərnəyi, Türkiyə-Azərbaycan Dostluq Cəmiyyətləri Federasiyasının (TADDEF) “İğdır Azərbaycan Evi” Dərnəyi, İzmir Azərbaycan Mədəniyyət və Həmrəylik Dərnəyi, Eskişehir Azərbaycanlılar Dərnəyi, Ukraynanın Jitomir şəhərindəki “Ukrayna Azərbaycanlılarının Həmrəylik Konqresi”, Krivoy Roq şəhərindəki “Azərbaycan Diasporu” təşkilatı, Odessa vilayətindəki “Birlik” diaspor təşkilatı kimi bir sıra diaspor təşkilatları, müxtəlif ölkələrdəki Azərbaycanlıların Koordinasiya Şuraları, Azərbaycan Evləri və diaspor üzvləri xüsusi fəallıq nümayiş etdiriblər.