Ukraynanın İsraildəki səfiri Yevgeni Korniyçuk, Rusiya Federasiyası tərəfindən Ukraynanın müvəqqəti işğal olunmuş ərazilərindən “qanunsuz” çıxarılan kənd təsərrüfatı məhsullarının bu ölkəyə daxil olması ilə bağlı İsrailin Xarici İşlər və Ədliyyə nazirliklərinə hüquqi yardım sorğusunun göndərildiyini bildirib.
Elchi.az xəbər verir ki, bu barədə “İnterfaks-Ukrayna” məlumat yayıb.
“Hüquqi yardım barədə sorğu gecə saatlarında Ukrayna Baş Prokurorluğundan daxil olub, onu nota ilə birlikdə yerli XİN-ə və Ədliyyə Nazirliyinə göndəririk. Vəkillərimiz sorğunu artıq birbaşa İsrail Baş Prokurorluğuna təqdim ediblər”, — deyə Korniyçuk çərşənbə günü agentliyə bildirib.
Məlumat verildiyi kimi, çərşənbə axşamı, aprelin 28-də İsrail Dövlətinin Ukraynadakı səfiri Mixael Brodski Ukrayna XİN-ə çağırılıb. Ona Rusiya tərəfindən Ukraynanın müvəqqəti işğal olunmuş ərazilərindən “qanunsuz” çıxarılan kənd təsərrüfatı məhsullarının İsrailə daşınmasının davam etməsi ilə bağlı etiraz notası təqdim olunub.
“Ukrayna tərəfi vurğulayıb ki, bu taxılın mənşəyi dəqiq müəyyən edilib, onun gizlədilməsi sxemləri, xüsusən də Qara dənizdə bir gəmidən digərinə boşaldılması halları İsrailin səlahiyyətli orqanları da daxil olmaqla hamıya yaxşı məlumdur. Buna baxmayaraq, müvafiq yüklər İsrail limanlarına daxil olmağa və kommersiya dövriyyəsinə buraxılmağa davam edir”, — deyə şərhdə bildirilir.
Həmçinin qeyd olunub ki, söhbət “ABINSK” gəmisindən gedir, lakin bundan əvvəl də İsrailə Rusiya tərəfindən Ukraynanın işğal olunmuş ərazilərindən “qanunsuz” çıxarılan kənd təsərrüfatı məhsulları ilə dolu bir neçə gəmi gəlib.
XİN xüsusilə vurğulayıb ki, İsrail tərəfinin Ukraynanın rəsmi müraciətlərinə və beynəlxalq hüquqi yardım sorğularına, o cümlədən gəmilərin və yüklərin saxlanılması xahişlərinə məhəl qoymaması, faktiki olaraq oğurlanmış Ukrayna taxılının qanuniləşdirilməsi üçün şərait yaradır. Nazirlik bəyan edib ki, bu halları tək-tək insidentlər deyil, Ukrayna ərazilərinin müvəqqəti işğalı ilə bağlı qanunsuz iqtisadi fəaliyyətə şüurlu yardım və sanksiyalardan yayınma əlamətləri daşıyan sistemli təcrübə kimi qiymətləndirir. Vurğulanır ki, bununla əlaqədar Ukrayna İsrail tərəfindən oğurlanmış taxılın idxalının dayandırılması və onun İsrail limanlarında boşaldılmasının qarşısının alınması üçün təxirəsalınmaz tədbirlər görməyi tələb edir.
Aprelin 27-nə olan məlumata görə, “ABINSK” gəmisi Hayfa reydində olub və boşaldılmasını gözləyib.
Məryəm
