İsrail Müdafiə Qüvvələrinin (SAXAL) əsgərinin Livanda İsa peyğəmbərin heykəlini sındırmasından sonra İsrailin Baş naziri Benyamin Netanyahu İsrailin xristianlara olan münasibətini izah etməyə çalışdığı geniş bəyanat yayıb.
Bu barədə Elchi.az Netanyahunun “X” sosial şəbəkəsindəki paylaşımına istinadən xəbər verir.
“Bir yəhudi dövləti olaraq İsrail dözümlülük, yəhudilər və bütün dinlərin mənsubları arasında qarşılıqlı hörmət kimi yəhudi dəyərlərini qiymətləndirir və onlara riayət edir. Bizim torpağımızda bütün dinlər çiçəklənir və biz bütün inancların nümayəndələrini cəmiyyətimizin və regionumuzun qurulmasında bərabərhüquqlu iştirakçılar kimi görürük.
Dünən, İsraillilərin mütləq əksəriyyəti kimi, mən də SAXAL əsgərinin Livanın cənubunda katolik dini ziyarətgahına zərər vurduğunu öyrənəndə şoka düşdüm və kədərləndim. Mən bu hərəkəti qətiyyətlə pisləyirəm. Hərbi rəhbərlik bu hadisə ilə bağlı cinayət işi üzrə araşdırma aparır və günahkar şəxs barəsində müvafiq ciddi intizam tədbirləri görüləcək.
Xristianlar Suriya və Livanda müsəlmanlar tərəfindən kütləvi qırğınlara məruz qaldığı bir vaxtda, İsraildəki xristian əhalisi inkişaf edir ki, bu da Yaxın Şərqin digər ölkələrində müşahidə olunmur. İsrail regionun yeganə ölkəsidir ki, burada xristianların sayı və həyat səviyyəsi artır. İsrail Yaxın Şərqdə hamı üçün din azadlığının qorunduğu yeganə yerdir. Biz bu hadisəyə və Livandakı, eləcə də bütün dünyadakı möminlərə dəymiş ola biləcək xətrə görə təəssüfümüzü bildiririk”, — deyə o yazıb.
Məryəm
