\Aralıq dənizini keçməyə çalışan qanunsuz miqrantları daşıyan qayığın aşması nəticəsində dənizdə 70-dən çox insanın itkin düşdüyü bildirilir.
Elchi.az xəbər verir ki, Liviya, Tunis, Malta və İtaliya arasında yerləşən və qanunsuz miqrasiyanın əsas marşrutu olan Mərkəzi Aralıq dənizində yeni bir miqrant faciəsi baş verib.
ABŞ-da yerləşən X şirkətinin sosial media platformasında İtaliyada yerləşən Mediterranea Saving Humans QHT-nin paylaşdığı məlumata görə, dünən Liviyadan yola düşdüyü bildirilən taxta miqrant qayığı Aralıq dənizinin Liviyanın axtarış və xilasetmə zonasına daxil olan hissəsində aşıb.
Paylaşımda dənizdə 70-dən çox insanın itkin düşdüyü və 32 nəfərin xilas edildiyi bildirilir. Avropa dövlətlərinin miqrasiya məsələsinə yanaşmasını da tənqid edən açıqlamada deyilir: “Dənizdə daha 70 nəfər itkin düşüb. Sağ qalanların, onların ailələrinin və dostlarının ağrısını bölüşürük. Bu son gəmi qəzası faciəvi bir qəza deyil, əksinə, qanuni və təhlükəsiz giriş kanallarını açmaqdan imtina edən Avropa hökumətlərinin siyasətinin nəticəsidir.”
İtaliyanın ANSA agentliyinin məlumatına görə, xilas edilən 32 nəfər və dənizdə tapılan 2 miqrantın cəsədi İtaliya Sahil Mühafizəsi Komandanlığına məxsus patrul qayığı ilə İtaliyanın Lampedusa adasına aparılıb.
Hesabatda xilas edilən miqrantların bəzilərinin gəmidə 110 nəfərin olduğunu söylədiyi bildirilib.
Bu arada, Beynəlxalq Miqrasiya Təşkilatının (IOM) məlumatlarına görə, ilin əvvəlindən 1 aprelə qədər Mərkəzi Aralıq dənizində 683 qanunsuz miqrant itkin düşüb.
Digər tərəfdən, İtaliya Daxili İşlər Nazirliyinin paylaşdığı məlumatlara görə, ilin əvvəlindən 3 aprelə qədər dənizdən ölkəyə keçən qanunsuz miqrantların sayı 6175 nəfər olub. Keçən ilin eyni dövründə gələn qanunsuz miqrantların sayı 9399 olaraq qeydə alınıb.
Şayəstə
