Ədliyyə Nazirliyi ölkədə qanunvericilik bazasının təkmilləşdirilməsi məqsədilə 2025-ci il ərzində 1.136 normativ hüquqi akt layihəsi hazırlayıb.
Bu barədə Elchi.az-a Nazirliyin Mətbuat xidmətindən məlumat verilib.
Bildirilib ki, həmçinin müvafiq dövlət orqanları tərəfindən Nazirliyə təqdim edilmiş 3.135 hüquqi akt layihəsinə hüquqi rəy verilib.
Ötən il ərzində Hüquqi Aktların Dövlət Reyestrinə daxil edilmək üçün təqdim olunan 780-dən çox akt qanunvericiliyin tələblərinə uyğun olaraq məcburi hüquqi ekspertizadan keçirilib, ümumilikdə 2.489 sənəd Hüquqi Aktların Dövlət Reyestrinə daxil edilib.
Hesabat dövründə milli qanunvericiliyin elektron bazası – “e-qanun.az” saytı da mütəmadi olaraq yenilənib, sayta 5,8 milyondan artıq giriş, 28,7 milyona yaxın baxış qeydə alınıb.
Bununla yanaşı, Ədliyyə Nazirliyi ilə Rəqəmsal İnkişaf və Nəqliyyat Nazirliyinin birgə əməkdaşlığı çərçivəsində istifadəyə verilmiş, Azərbaycanın hüquqi sənəd və qanunvericilik bazasında effektiv axtarış aparmağa imkan verən süni intellekt əsaslı və milli hüquqi bazaya əsaslanan “e-qanun.ai” platformasında 4 ay ərzində 675 minə yaxın sorğu emal edilib.
