Fransa prezidenti Emmanuel Makron Britaniya kralı III Çarlzın Fransaya səfərinin “dostluq” əlaməti olduğunu bəyan edib.
Elchi.az xəbər verir ki, İngiltərə kralı III Çarlz Fransaya 3 günlük rəsmi səfəri çərçivəsində Makronun Versal sarayında verdiyi şam yeməyinə qatılıb.
Makron və xanımı Bricit Makronun verdiyi şam yeməyinə kral III Çarlz, həyat yoldaşı Kamilla və Fransanın baş naziri Elizabet Borne də daxil olmaqla 160 qonaq qatılıb.
Britaniya kralı III Çarlz və Makron nahardan əvvəl danışıblar.
Kral Çarlz-a müraciət edən Makron, “Fransaya səfər etmək seçiminiz dostluq və etimad əlamətidir” deyib.
Emmanuel Makron bəyan edib ki, Kral III Çarlz bundan əvvəl Fransanın müxtəlif şəhərlərinə 30-dan çox səfər edib.
Fransa ilə İngiltərə arasındakı sıx tarixi əlaqələrə diqqət çəkən Makron Kral III Çarlzın vəfat edən anası İngiltərə kraliçası II Yelizaveta və atası Şahzadə Filipi yad edib.
Fransa ilə İngiltərə arasında münasibətlərin hər zaman dinc olmadığını qeyd edən Makron, gələn il iki ölkənin Böyük Britaniya-Fransa dostluq müqaviləsinin 120-ci ildönümünü qeyd edəcəklərini xatırladıb.
“Mən bilirəm ki, biz birlikdə qitəmizin gələcəyinin bir hissəsini yazmağa və çətinliklərin öhdəsindən gəlməyə davam edəcəyik” -Makron deyib.
Kral III Çarlz ingilis və fransız dillərində etdiyi çıxışında Makrona Fransaya dəvətinə və rəsmi səfərinin ilk günündə onu qarşıladığına görə təşəkkür edib.
Nuranə Məmmədova
Son şərhlər