Dünyanın ən qədim cins şalvarı 1857-ci ildə Şimali Karolina sahillərində batan gəmidə tapılıb. Önü düyməli cins şalvarın mədənçiyə aid olduğu düşünülür.
Elchi.az “Milliyet.com.tr”-yə istinadən bildirir ki, dekabrın 3-də Nevada ştatının Reno şəhərində hərrac keçirilib. Hərracda cins şalvarlar da daxil olmaqla “Qızıl hücum” dövrünə aid 270 ədəd əşya 1 milyon dollara satılıb.
Əşyaları satışa çıxaran Kaliforniya Qızıl Marketinq Qrupunun icraçı direktoru Dwight Manley bildirib: “Bu mədən şalvarları Aydakı ilk bayrağa bənzəyir, tarixi bir anı təmsil edir”.
Satışa çıxarılan bütün parçalar 1857-ci ilin sentyabrında batan SS Central America paroxodundan tapılıb. 1800-cü illərin ikinci yarısında ABŞ-da “Qızıl hücum” dövrü baş vermişdi. Mərkəzi Amerikadan ABŞ-ın şərq sahillərinə sərnişin daşıyan bu 85 metrlik gəmi “qızıl gəmi” də adlanırdı. SS Central America gəmisi fırtınada batıb, 578 sərnişin və ekipajdan 425-i həlak olub.
Gəmi ilə birlikdə 21 ton qızıl və malın batdığı təxmin edilir. Qəza 1988-ci ildə aşkar edilib. Sözügedən şalvar Con Dement adlı şəxsin çamadanında tapılıb. Şalvarın San-Fransiskoda alındığı güman edilir.
Hərrac rəsmiləri əlavə edib ki, ön tərəfində beş düyməli bu model sonradan Levi Strauss ilə eyniləşdirilən iş şalvarlarının ilk nümunələrindən biri ola bilər.
Levi Strauss gəminin batmasından 16 il sonra, 1873-cü ildə San-Fransiskoda ilk mavi cins şalvar istehsal edib. 1880-ci illərə aid olduğu düşünülən və ABŞ-ın qərbindəki mədəndə tapılan Levi’s cins şalvar iki ay əvvəl 76 min dollara satılıb.
Yeganə
Son şərhlər