Azərbaycan regionda nəqliyyat dəhlizi rolunu oynayır.
Elchi.az xəbər verir ki, bunu Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev deyib.
Avropa İttifaqı-Azərbaycan əlaqələrinə toxunan Fərid Şəfiyev bildirib ki, bu günlərdə Aİ-nin reputasiyası zədələnib.
“Avropa Parlamentinin birtərəfli qətnaməsi Azərbaycan ictimaiyyətində dərin təəssüf doğurur”, – Mərkəz sədri əlavə edib.
O qeyd edib ki, bu gün ərazi bütövlüyü prinsipi beynəlxalq gündəmdədir: “Avropalı siyasətçilər Avropa regionunda bir ölkənin ərazi bütövlüyünün təhlükə qarşısında olduğunu, işğalla qarşılaşdığını deyirlər. Lakin xatırlatmaq istəyirəm ki, 1992-93 illərdə də Avropada ərazi bütövlüyü pozulmuşdu. Amma Aİ-dən bu gün Ukrayna üçün göstərilən yanaşmanı biz Azərbaycan üçün görmədik. 30 il Azərbaycanın torpaqları işğal altında qaldı, mədəni-tarixi irsi məhv edildi, lakin Aİ-dən reaksiya olmadı”.
Fərid Şəfiyevin sözlərinə görə, ötən ilin dekabr ayında Brüsseldə üçtərəfli sammitdən sonra müəyyən ümidlər yaranmışdı, lakin bu gün Avropa ölü “Madrid prinsipləri”ni canlandırmağa çalışır və Fransa diplomatik səviyyədə bununla bağlı fikirlər səsləndirir.
O diqqətə çatdırıb ki, regionun gələcəyi üç ölkə arasında dayanıqlı sülhdən, əməkdaşlıqdan asılıdır.
“Düşünürəm ki, Avropa Parlamentinin qərarına ən yaxşı cavab Aİ və Azərbaycan arasında sazişin tez bir zamanda imzalanmasıdır. Ümid edirəm ki, bu il bu saziş imzalanacaq”, – Fərid Şəfiyev bildirib.
Son şərhlər