İqor Muradyan: “Ermənistan hakimiyyəti boş, qorxaq, 30 rubla nökərçilik etməyə hazır cəmiyyətin əksidir”
Ruben Mehrabyan: “Rusiya kimi müttəfiqmiz olduqdan sonra bizə başqa düşmən lazım deyil”
Ermənistanın tanınmış analitiklərindən İqor Muradyan “ABŞ və Ermənistan arasında siyasi-hərbi sazişin faktorları” adlı məqaləsində ölkə rəhbərliyini xarici siyasətdə tutduğu mövqeyə görə sərt sözlərlə tənqid edib.
Muradyan məqaləsində Rusiya meylli erməni cəmiyyəti haqqında ağır ifadələr işlətməkdən çəkinməyib.
İ.Muradyan yazır: “Hələ “Qarabağ uğrunda hərəkat”la bağlı aksiyalar başlayan zaman məlum idi ki, olduqca primitiv və ruhən korrupsiyalarmış cəmiyyətdə fəaliyyət göstərməli olacağıq. İnsanlar fədakarlıq və cəsarət nümayiş etdirsələr də, hərəkata daxil olan sarsaqların sayı da çox idi.
Hərəkatın rəhbərliyinə isə təkcə Rusiyaya vassal meylli büdcə təşkilatlarının sahibləri deyil, həm də isterik və təcrübəsiz adamlar da daxil olmuşdu. Hakimiyyət ələ keçirilsə də mahiyyət etibarı ilə heç nə dəyişmədi.
Ermənistan demək olar ki, var-yoxdan çıxdı, ermənilər müxtəlif vağzallara qaçışdılar, siyasi qruplar tamamilə satılaraq hakimiyyət dairələrini öz patronları olaraq qəbul etdilər.
Ermənistana qarşı ən böyük cinayət isə onun qərb cəmiyyətindən, NATO və Avropa Birliyindən uzaqlaşdırılması oldu.
Ermənistan Rusiya tərəfindən hər yandan bloklanmış vəziyyətdədir. Hakim dairələrdə rus agenturasına xidmət edən iyrənc şəxslər daxil olub.
Əlbəttə, vəziyyətin bu həddə çatmasında Ermənistanı bu vaxta qədər idarə etmiş prezidentlərin də günahı var. Lakin məsələ təkcə prezidentlərdə deyil.
Ermənistan hakimiyyəti boş, qorxaq, 30 rubla nökərçilik etməyə hazır cəmiyyətin əksidir, bu həmişə belə olub.
Ermənistan böyük imkanlarını əlindən qaçırıb və təhlükəsizlik sərtləri və faktorlarının olmadığı bir həddə gəlib çatıb.
Qeyd etmək lazımdır ki, erməni cəmiyyəti bu məsələdə əsl irsi sədaqət nümayiş etdirir. Hakimiyyət strukturları ətrafında daha şərəfsiz və satqın, yeni nəsil peyda olub. İndi Rusiyadan aralanmanın təhlükəli olduğu təlqin edilir. Bundan daha degenerativ fikir tapmaq mümkün deyil. Bu ideyanın əsas daşıyıcıları isə Ermənistanın gənc nəslinin nümayəndələridir. Özü də erməni gənclərinin Azərbaycanla müharibədə Rusiya silahları ilə öldürüldüyü bir situasiyada…”.
Müəllif məqaləsində Ermənistanın Rusiya ilə yaxınlaşması sayəsində Azərbaycana nisbətən Qərblə daha uzaq məsafədə dayandığını vurğulayıb:
“NATO demokratiya ilə bağlı şərtlərə xüsusi diqqət edir.
Lakin demokratiya sahəsində bir çox problemlərlə xarakterizə olunan Azərbaycan NATO-nun Əfqanıstanda və başqa bölgələrində əməliyyatlarda fəal iştirak edir və alyans tərəfindən etibarlı partnyor kimi tanınır.
Demokratiya ilə bağlı nisbətən daha az problemli sayılan Ermənistan isə Rusiya və KTMT ilə müttəfiqliyi ucbatından ABŞ və NATO ilə strateji münasibətlər qura bilmir”,- Muradyan məqaləsində qeyd edib.
Ermənistanın digər tanınmış siyasi icmalçısı Ruben Mehrabyan isə “Bu nə sülh, nə barışdırma, nə də Kemp-Deviddir” adlı məqalədə ölkənin ilk prezidenti Levon Ter-Petrosyanı partiyanın qurultayında Rusiya ilə bağlı səsləndiridiyi fikirlərə görə tənqid edib. Xatırladaq ki, Levon Ter-Petrosyan Qarabağ münaqişəsinin həllinin açarının Rusiyanın əlində olduğunu söyləmişdi.
“Qarabağ münaqişəsi Rusiyanın postsovet məkanında ən sevimli münaqişədir. Rusiyanın əlində isə münaqişənin həllinin deyil, qızışdırılmasınn açarı var. Erməni tərəfi isə bu açarı Rusiyanın əlindən almağı bacarmalıdır”- müəllif qeyd edir.
“Moskva indi erməni tərəfinin birtərəfli güzəştləri sayəsində münaqişənin “həndəsəsini” dəyişdirərək, regionda öz iştirakını genişləndirmək və münaqişə tərəflərini öz sülhməramlılarını bölgəyə yerləşdirməyə vadar etməyə cəhd edir”, – Mehrabyan yazır.
“Azərbaycan və erməni xalqları sülhə gələrək, dinc və mehriban qonşuluq münasibətlərində yaşaya bilərlər. Bu cür sülh Misir və İsraildə olduğu kimi kompromislər yolu ilə əldə edilə bilər. Lakin Kemp-Deviddə olduğu kimi, sülh Rusiyasız, Rusiyaya rəğmən, onu təşəbbüsü olmadan, onun “aktiv səyləri” ilə həyata keçirilmədən və ən əsası onun rəhbərliyi altında baş vermədən əldə edilməlidir.
Əlbəttə, biz bütün bunlara görə öz “strateji müttəfiqimizə” minnətdar olmalıyıq, çünki belə bir müttəfiq olduqdan sonra bizə başqa düşmən lazım deyil”,- Mehrabyan yazıb.
Son şərhlər