Naxçıvan Muxtar Respublikasında (MR) 1 yanvar 2016-cı il tarixə əhalinin sayı bir il öncəyə nisbətdə 4 min 641 nəfər artaraq 444 min 423 nəfər təşkil edib. Hazırda muxtar respublika əhalisinin 49,9%-ni kişilər, 50,1%-ni isə qadınlar təşkil edir. Əhalinin 29,5%-i şəhər, 70,5%-i isə kənd yerlərində yaşayır.

Bu barədə Naxçıvan Muxtar Respublikasının Statistika Komitəsindən  bildirilib.

Komitədən bildirilib ki, Muxtar respublikada bir kvadratkilometrə düşən əhalinin sayı 81 nəfər olub ki, bu da 1 yanvar 1996-cı illə müqayisədə 20 nəfər çoxdur.1995-ci ilin sonu ilə müqayisədə əhalinin sayı 106,6 min nəfər artıb.

“Son 20 il ərzində muxtar respublikada 62,4 min nikah bağlanıb. 153,5 min nəfər uşaq doğulub.

Əhali sağlamlığının və rifahının davamlı yüksəlişi, tibbi xidmətlərin keyfiyyətinin və əhatəliliyinin artırılması ölüm, o cümlədən 1 yaşa qədər ölən uşaqların sayını aşağı salıb.

Əgər 1995-ci ildə ölüm göstəricisi əhalinin hər min nəfəri hesabı ilə 6 nəfər olmuşdursa, hazırda bu göstərici 4,2 nəfər təşkil edir.

Hər min nəfər doğulana hesabı ilə 1 yaşa qədər ölən uşaqların sayı 1995-ci ildə 20,6 nəfər qeydə alındığı halda, 2015-ci ildə bu göstərici 0,8 nəfər təşkil edib.

Əgər 1995-ci ildə gənclərin sayı ümumi əhalinin 22%-ni təşkil edirdisə, 1 yanvar 2016-cı il tarixə bu göstərici 30,8%-ə çatıb. 1995-ci illə müqayisədə gənclərin sayı 62,6 min nəfər artaraq 137 min nəfərə yaxın olub”, – deyə komitədən qeyd edilib.