Müğənni Röya Ayxan və jurnalist İsa Şükürov arasında qalmaqal bir neçə ildir davam edir. Tərəflərin bölüşdürə bilmədiyi bir şey olmasa da, cütlüyün bir-birinə simpatiyası da yoxdur. Müğənni və jurnalist bir neçə dəfə aralarında yaşanan qalmaqal ilə media gündəminə düşməyi də bacarıb.
Son qalmaqal isə ötən həftə baş verib. Müğənni Röya Ayxan qarşı tərəfin heç günahı olmadan İsa Şükürovu “İnstagram” sosial şəbəkəsində təhqir edib. Müğənni elə düşünüb ki, saytlardan birində gedən məqalənin müəllifi İsa Şükürovdur. Düzdür, Röya sonradan səhvini anlayıb, yazdıqlarını pozsa da, artıq iş-işdən keçmişdi.
Ünvanına yazılan təhqirdən sonra jurnalist müğənnini məhkəməyə verəcəyini bildirsə də, musavat.com-a açıqlamasında məhkəmədən imtina etdiyini bildirib. Jurnalistin dediyinə görə onu fikirindən daşındıran isə xalq artisti Aygün Kazımova olub:
“Röya ilə aramda ilk dəfə deyil ki, xoşagəlməz söhbət yaşanır. Keçən dəfə susdum. Düşündüm ki, böyüklük etsəm, bəlkə o, bir daha belə səhvə yol verməz. Amma demək ki, yanılmışam. Röyanın ikinci dəfə ünvanıma yazdığı təhqirlərdən sonra məcbur qalıb onu məhkəməyə verməli oldum. Vəkillə danışdım, vəkilə etibarnamə verdim. Bütün sənədləri topladım. Lakin məhkəmə öncəsi xalq artisti Aygün Kazımova ilə məsləhətləşdim. O, məni bu fikirdən daşındırdı. Aygün xanım böyük sənətkardır. Onun ürəyinin bu qədər yumşaq, mərhəmətli olduğunu bilirdim. Amma buna bir daha şahid oldum. Bəlkə də digər sənətçi olsaydı, mənə dəstək durardı. Arxamda dayanıb sona qədər məndən alət kimi istifadə edərdi. Lakin Aygün xanım mənə kifayət qədər böyük məsləhətləri verdi. Onun istəyi ilə Röyanı məhkəməyə vermək fikrindən daşındım. Röya bu addımımı Aygün Kazımovadan özünə jest kimi qəbul etsin. Çünki özümə qalsaydı, bu işin sonuna kimi gedəcəkdim”.
Qeyd edək ki, jurnalist İsa Şükürov xalq artisti Aygün Kazımovaya xüsusi rəğbəti ilə seçilir. O, Aygün Kazımovanın qızı İlqarə Kazımovanın meneceridir.
Xalidə Gəray
Son şərhlər