Bunu virtualaz.org saytına açıqlamasında MTN-in sabiq əməkdaşlarından birinin vəkili Kamandar Nəsibov deyib.

General-mayor Akif Çovdarovun vəkili R.Sadıqov kimi K.Nəsibov da müdafiə tərəfinin şəxsi qeydlərinin Penitensiar Xidmətin 1 saylı İstintaq Təcridxanasında əsassız olaraq yoxlanmasından narazıdır:“Bu, Cinayət-Prosessual Məcəllənin müddəlarının kobud şəkildə pozulmasıdır. Bununla bizi müdafiə hüququndan məhrum edirlər. Çoxları bizə hiddətlənir. Deyirlər ki, öz xalqına və dövlətinə qarşı bu cür ağır cinayətlər törədən, bütün cəmiyyət tərəfindən qınanılıb lənətlənən sabiq MTN-çilərin hüquqlarını niyə müdafiə edirsiniz… Amma nəzərə almaq lazımdır ki, əvvəla, bütün bu cinayətlər məhkəmədə sübuta yetirilməlidir. Axı Azərbaycan hüquqi dövlətdir. Burada hər şeyi qanunlar həll edir. Elə deyilmi? İkincisi, hər bir cinayətkarın müdafiə hüququ var. İlk növbədə ilkin istintaq və məhkəmə zamanı belə hüququ var. Bizsə peşəkar vəkillər kimi onların belə bir müdafiə hüququnun təmin olunmasına çalışmalıyıq, onlara bu imkanı verməliyik. Amma bizə işləməyə imkan vermirlər”.

K.Nəsibovun sözlərinə görə, vəkillər öz müvəkkilləri ilə görüşmək üçün görüş otağına daxil olmazdan əvvəl Ədliyyə Nazirliyi Penitensiar Xidmətin əməkdaşları onların üst-başını axtarır və bütün şəxsi yazışmalarını yoxlayırlar.

Vəkilin fikrincə, istintaq vəkilin öz müvəkkili ilə gizli yazışma hüququnu, deməli, həm də milli qanunvericiliyin və Avropa Konvensiyasının müddəalarını pozur.

Bundan əlavə, həbsdə olan sabiq MTN əməkdaşları vəkilləri ilə danışmaqdan imtina edirlər. Onlar bundan görüş otaqlarında dinləmə qurğularının (hansı ki, onları bir vaxtlar elə özləri digər məhbus və məhkumları dinləmək üçün quraşdırıblar) olmasını əsas gətirərək imtina edir.

K.Nəsibov bütün bunları əsas gətirərək məhkəməyə müraciət etməyi planlaşdırır və Azərbaycan prezidentinin adına şikayət məktubu yazmaq niyyətindədir.