Üzeyir Cəfərov: “Ermənistanın bu siyahıda olmaması tam normaldır”
Bu sözləri ANS PRESS-ə açıqlamasında hərbi ekspert Üzeyir Cəfərov bildirib. Onun sözlərinə görə, son illərdə Azərbaycanın silahlı qüvvələrində aparılmış işlər, hərbi texnikanın, silah-sursatın alınması da Azərbaycanın reytinqinin qalxmasına təsir edib.
“O ki qaldı Ermənistana, bu ölkə həm iqtisadi, həm də hərbi cəhətdən Rusiyadan tam asılı bir dövlətdir. Buna görə də Rusiyada olan çətinliklər Ermənistana da öz təsirini göstərir və Ermənistanın adının bu siyahıda olmaması tam normaldır”, – deyə ekspert əlavə edib.
Üzeyir Cəfərovun fikrincə, yaxın bir neçə ildə Azərbaycan ən güclü ordular siyahısında daha da irəliləyəcək. “Mənim fikrimcə, 2015-ci ilin ikinci yarısında tərtib olunacaq reytinq siyahısında Azərbaycan daha yüksək pillələrə qalxacaq”, – deyə o əlavə edib.
Xatırladaq ki, “Global Firepower” saytı dünyanın ən güclü ordularının siyahısını tərtib edib. Həmin siyahıda Azərbaycan Ordusu 106 ölkə içərisində 50-ci yerdədir. Siyahıda ilk onluqda müvafiq olaraq ABŞ, Rusiya, Çin, Hindistan, Böyük Britaniya, Fransa, Almaniya, Türkiyə, Cənubi Koreya və Yaponiya yer alıb.
ANS PRESS
