“Azərbaycan erməni terrorundan əziyyət çəkən bir ölkə olaraq bu terroru qətiyyətlə pisləyir. Eyni zamanda, peyğəmbərimizlə bağlı 
karikaturaların yayılması da qəbulolunmazdır”.
Bu sözləri Axar.az-a açıqlamasında Dini Qurumlarla İş üzrə Dövlət Komitəsinin sədri Mübariz Qurbanlı deyib. Onun sözlərinə görə, bu cür karikaturaların yayımı ilə məşğul olan jurnalların fəaliyyəti dərhal dayandırılmalıdır:
“Çünki bu, müsəlman aləminə qarşı bir basqıdır və qıcıq yaradır. Buna görə də peyğəmbərlərlə bağlı bü cür karikaturaların çəkilməsinin qətiyyən əleyhinəyik. Hesab edirəm ki, xristianlıq və islam arasında münasibətlər nizamlanmalı və belə hərəkətlərə yol verilməməlidir. Avropa ölkələrində islamafobiya onsuz da var. Ancaq bundan sonra bütövlükdə Avropada yaşayan müsəlmanlara qarşı hansısa geniş səpkili təxribatların olacağı ehtimalı azdır.
Çünki Avropada müsəlmanların sayı kifayət qədər çoxdur. Eyni zamanda, Avropada müsəlman icmaların rəhbərləri də bu terror aktını qətiyyətlə pisləyiblər. Oradakı müsəlmanlar çox gözəl başa düşürlər ki, terrorçu dinin daşıyıcısı kimi qiymətləndirilməməlidirlər. Terrorçunun milliyəti, irqi və dini yoxdur. Terrorçu terrorçudur. Mən kütləvi şəkildə Avropada yaşayan müsəlmanlara qarşı bundan sonra hansısa basqıların olacağını proqnozlaşdırmıram. Ayrı-ayrı radikal qruplar müsəlman məscidlərinə hücumlar təşkil edə bilərlər. Ancaq bütövlükdə müsəlmanlara qarşı kütləvi basqının olması mümkün deyil”.
Komitə sədri bu terror hadisələrinin istər-istəməz iki dini dünyagörüş arasındakı münasibətlərə xələl gətirdiyini və bunun islamafobiyanı artırdığını bildirib:
“Avropada ya qanunvericiliklə, ya da başqa vasitələrlə dinin müqəddəslərini təhqir edən yazıların qarşısı dərhal alınmalıdır. Bunun mətbuat və insan azadlığı ilə heç bir əlaqəsi yoxdur. Hər bir dinin öz müqəddəsləri var və onları ələ salan yazılar, filmlərin çəkilməsi əsla yolverilməzdir. Buna görə də bu məsələ dünya üzrə müzakirə olunamlıdır ki, bu cür qarşıdurmalara gətirib çıxaran bəhanələrə imkan verilməsin və radikallar bundan sui-istifadə etməsinlər. Bu prosesin üzərində dayanılmalı və tolerantlıq, multikulturalizm ideayaları yayılmalıdır”.
Son şərhlər