Kuba Prezidenti Migel Diaz-Kanel ölkəsinin suverenliyə və öz müqəddəratını təyinetmə hüququna hörmət əsasında ABŞ ilə dialoqa hazır olduğunu bildirdi.
Elchi.az xəbər verir ki, ölkəsindəki bir televiziya kanalına danışan Diaz-Kanel, ABŞ ilə son zamanlar gərginləşən münasibətlərə diqqət çəkdi.
Diaz-Kanel, qonşular arasında mədəni və qarşılıqlı faydalı münasibətlər qurmaq istədiklərini bildirərək, “Suverenliyə və öz müqəddəratını təyinetmə hüququna hörmət əsasında ABŞ ilə dialoqa hazırıq” dedi.
Diaz-Kanel, immiqrasiya, təhlükəsizlik, narkotik qaçaqmalçılığı, terrorizmə qarşı mübarizə, ətraf mühit məsələləri və ABŞ hökuməti ilə elmi əməkdaşlıq kimi məsələləri müzakirə etməyə açıq olduqlarını vurğuladı, lakin ölkəsinin daxili işlərinə müdaxilə edilməməsi şərtini qoydu.
ABŞ-ın artan təcavüzü qarşısında müdafiə planı hazırladıqlarını bildirən Diaz-Kanel, “Hücuma qarşı hazırlıq suveren bir vəzifədir. Çətin günlərdən keçəcəyik, xüsusən də bu dövr çox çətindir” dedi.
Diaz-Kanel, ABŞ-ın ölkəsinə tətbiq etdiyi neft blokadasına toxunaraq dedi: “Ötən ilin dekabr ayından bəri xaricdən yanacaq almamışıq. Böyük bir dövlətin kiçik bir ölkəyə qarşı bu qədər aqressiv və cinayətkar siyasət yürütməsi qınaq doğurur. Bu, bizi tamamilə boğmaq deməkdir. Müqavimət göstərməsək, təslim olacağıqmı?”
O, yanacaq çatışmazlığı səbəbindən qida daşınmasının, qida istehsalının, ictimai nəqliyyatın, xəstəxanaların, məktəblərin və turizmin ciddi şəkildə təsirləndiyini qeyd etdi və bu vəziyyətə qarşı bir sıra tədbirlər gördüklərini bildirdi.
Mətbuatda yer alan məlumata görə, Venesuelanın enerji ehtiyaclarını ödəmək üçün gündə təxminən 110.000 barel neftə ehtiyacı var və Venesuelanın 2025-ci ildə bu miqdardan təxminən 30.000 barel təmin edə biləcəyi bildirilir.
Şayəstə
