Bakıda da “Kapellhaus” Alman-Azərbaycan Mədəniyyət Mərkəzində Swing və Jazz rəqslərinə həsr olunmuş “SWING & JAZZ Night” adlı rəngarəng gecə keçirilib.
Musiqi və rəqsin vəhdətində təşkil olunan tədbir paytaxtın cazsevər auditoriyasını bir araya gətirib.
Tədbirdə ABŞ-ın Azərbaycandakı Səfirliyinin Müvəqqəti işlər vəkili xanım Emi Karlon, Mədəniyyət attaşesi Rendi Kol, “Azərbaycan Televiziya və Radio Verilişləri” Qapalı Səhmdar Cəmiyyətinin sədri Rövşən Məmmədov, ABŞ Səfirliyin Mədəniyyət və İdman Proqramları üzrə meneceri Fərqanı Əliyev, Mirzə İbrahimovun irsinin qorunması və təbliği” Fondunun təsisçisi, professor Sona İbrahimova, “AZƏRTAC” Mədəniyyət şöbəsinin redaktoru, dramaturq Anara Axundova və digərləri iştirak ediblər.
Gecənin rəsmi açılışı Lenay və Kavenin giriş sözləri və Azərbaycanda lindy hop rəqsinin tarixçəsi ilə başlayıb. Ardınca səhnəyə çıxan Orxan Ağayev “Seven Nation Army”, “La Mer”, “Let it snow”, “I will survive” və “That’s life” kimi məşhur ifaları ilə tamaşaçılara caz ab-havası yaşadıb.
Tədbir proqramı çərçivəsində “SwingIN’Baku” studiyasının tələbələrinin ifasında “Swingin Paws” xoreoqrafiyası təqdim olunub. Xoreoqraf Lenay Seid-Əlizadə tərəfindən hazırlanan bu nömrə gecənin ən yadda qalan çıxışlarından biri olub.
Vokal ifalar gecəyə xüsusi ovqat qatıb. Leyla Noir “When I fall in love”, “The man I love” və “All of me” mahnılarını səsləndirib. Daha sonra “LYNX” və “Gülüstan” rəqs qruplarının əməkdaşlığı ilə hazırlanan “Another day of sun” nömrəsi təqdim olunub. Solo ifaçılar Günay Əşrəfova və Emil Əzizovun çıxışı alqışlarla qarşılanıb.
Proqram IMEC studiyasının tələbələrinin musiqi nömrələri ilə davam edib. Bella Novruzova “Je veux” və “La sien” kompozisiyalarını, Aida Əmirbəyova isə “Beggin” mahnını ifa edib. Bu çıxışların müəllimləri Leyla Gerayzadə və Nigar Hüseynli olub.
Gecədə həmçinin gənc və istedadlı jazz ifaçısı SEVİL “At last”, “Hit The Road Jack” və “It could happen to you” mahnılarını ifa edib.
Respublikanın Xalq artisti, canlı caz əfsanəsi Cavan Zeynallı gecənin xüsusi qonağı kimi səhnəyə çıxıb. Onun ifasında səslənən məşhur “Feelings” və digər sevilən kompozisiyalar zalda toplaşan tamaşaçılara unudulmaz anlar yaşadıb. Ustad sənətkarın özünəməxsus dərin emosiyası və səhnə mədəniyyəti gecəyə fərqli ovqat qatıb. Korifeyin çıxışı tədbirin ən təsiredici və yadda qalan anlarından biri kimi yaddaşlarda qalıb.
HEGGY “Fly me to the moon” və “My baby just care for me” mahnıları ilə səhnəyə çıxıb. Leyla Noir gecənin ikinci hissəsində “Cheek to cheek”, “Love” və “Hello, Dolly” ifaları ilə yenidən tamaşaçı qarşısına çıxıb.
Tədbirin sonunda Lenay Seidali-zadən yekun çıxışı və “SwingIN’Baku” musiqi klubunun 2 illiyi münasibətilə tortun kəsilməsi baş tutub.
Lenay xanım söylədi ki, 2 il öncə Bakıda lindy hop cəmiyyətinin yaradılmasında cəmi iki insanın – Eylem Ülüş və Lenay Seidəli-zadənin – inamı, jazz musiqisinə və rəqsinə sevgi və həvəsləri olubsa, bu gün keçirilən tədbir cəmiyyətin böyüməsi və aktiv şəkildə fəaliyyət göstərməsi, tələbələrin nailiyyətləri və jazz rəqslərin Azərbaycanda inkişaf etməyinin təsdiqidir.
Axşamın sonunda Bakı lindy hop cəmiyyətinin üzvləri tərəfindən Frankie Manningin xoreoqrafiyası olan klassik “Shim-Sham” caz rutini nümayiş etdirilib.
Qeyd edək ki, Bakı son illər caz musiqisi ilə yanaşı, caz və sving rəqslərinin inkişaf etdiyi mühüm mərkəzlərdən birinə çevrilməkdədir. Bu sahədə fəaliyyət göstərən studiyalar, canlı musiqi gecələri və tematik tədbirlər gənclərin caz mədəniyyətinə marağını artırır. Xüsusilə lindy hop, charleston və swing kimi rəqs növləri Bakının mədəni həyatında yeni nəfəs kimi dəyərləndirilir. “SWING & JAZZ Night” kimi gecələr isə bu mədəniyyətin təbliğində və davamlı inkişafında xüsusi rol oynayır.
Havar Şəfiyeva
