ABŞ prezidenti Tramp Ukrayna-Rusiya müharibəsi ilə bağlı Avropa liderləri ilə geniş müzakirələr apardığını bildirib və diplomatik prosesin “ehtiyatla, lakin müsbət şəkildə” davam etdiyini əlavə edib.
Elchi.az xəbər verir ki, Ağ Evdə jurnalistlərin suallarını cavablandıran ABŞ prezidenti Donald Tramp təxminən bir saat əvvəl Avropa liderləri ilə görüşlərinə toxunaraq deyib: “Rusiya ilə Ukrayna arasındakı müharibənin də müzakirə olunduğu çox yaxşı bir görüş keçirdik. Uzun bir görüş idi. Görünür, işlər yaxşı gedir, amma biz də bilirik ki, bu, çətin bir prosesdir.”
Ukrayna prezidenti Volodymyr Zelensky ilə də uzun bir telefon danışığı etdiyini qeyd edən Tramp, Almaniya, İtaliya, NATO, Finlandiya, Fransa, Birləşmiş Krallıq, Polşa, Norveç, Danimarka və Hollandiya liderləri ilə “çox uzun və çox yaxşı” əlaqələri olduğunu bildirib.
“Müharibənin yenidən başlamasının qarşısını almaq üçün təhlükəsizlik zəmanətləri üzərində işləyirik”
ABŞ Prezidenti Tramp Ukraynanın tələb etdiyi təhlükəsizlik zəmanətlərinin Avropa ilə birlikdə formalaşdırıldığını vurğulayaraq dedi: “Avropa bu prosesin böyük bir hissəsi olacaq. Müharibənin yenidən başlamasının qarşısını almaq üçün təhlükəsizlik zəmanətləri üzərində işləyirik. Müharibənin yenidən başlamasını istəmirik”.
Trampın açıqlamaları ABŞ rəsmilərinin Berlində Ukrayna üçün NATO-nun 5-ci maddəsinə bənzər güclü təhlükəsizlik zəmanətlərini özündə birləşdirən “sülh paketi” üzrə danışıqlarda əhəmiyyətli irəliləyiş əldə edildiyini açıqlamasından sonra gəldi. Rəsmilər bu zəmanətlərin məhdud müddətə təklif olunacağını və yekun razılaşma əldə olunarsa, paketin ABŞ Senatına aparılacağını bildirdilər.
Ukrayna sülh danışıqlarını aparmaq vəzifəsi daşıyan ABŞ Prezidenti Trampın xüsusi nümayəndəsi Stiv Vitkov və kürəkəni Cared Kuşner son iki gündür Ukrayna və Rusiya arasında razılığa gəlmək üçün Almaniyanın paytaxtı Berlində müxtəlif görüşlər keçirirlər. Danışıqlar barədə jurnalistlərə məlumat verən ABŞ rəsmisi bildirib ki, Ukraynaya NATO müqaviləsinin 5-ci maddəsinə bənzər bir zəmanət veriləcək. Maddəyə əsasən, üzv dövlətlərdən birinə silahlı hücum bütün üzvlərə hücum hesab olunur. ABŞ danışıqlar qrupunun avropalı həmkarları ilə müzakirələrdən sonra hazırlanmış “sülh paketi”nin son layihəsini gələn həftə Prezident Trampa ətraflı şəkildə təqdim etməsi gözlənilir.
Şayəstə
