Ukrayna Prezidenti Vladimir Zelenski bildirib ki, ABŞ, Ukrayna və Avropa nümayəndə heyətləri arasında İsveçrənin Cenevrə şəhərində keçirilən danışıqlardan sonra müharibəyə son qoymaq üçün lazımi addımlar atmaq mümkün ola bilər. O deyib: “Əgər danışıqlar olarsa, konstruktiv öhdəlik olarsa, əgər biz həqiqətən müharibəyə son qoyuruqsa, onda Ukraynaya və xalqımıza qarşı raket hücumları və ya digər genişmiqyaslı hücumlar olmamalıdır”.
Elchi.az xəbər verir ki, Ukrayna Prezidenti Vladimir Zelenski ABŞ-ın Rusiya ilə müharibəyə son qoymağı hədəfləyən 28 maddəlik sülh təklifi çərçivəsində İsveçrənin Cenevrə şəhərində keçirilən danışıqlarla bağlı açıqlamalar verib. Zelenski sosial media platforması X-də paylaşım edərək qeyd edib ki, Ukrayna nümayəndə heyəti ABŞ və Avropa tərəfdaşları ilə danışıqlardan sonra Cenevrədən qayıdıb və əlavə edib: “İndi müharibəyə son qoymaq üçün lazımi addımlar mümkün ola bilər. Cenevrədən sonra artıq 28 maddə qalmayıb, daha az məsələ qalıb və bu çərçivədə bir çox düzgün elementlər nəzərdən keçirilib”.
“Trampla həssas məsələləri müzakirə edəcəyəm”
Zelenski bu məsələ ilə bağlı razılığa gəlmək üçün hər kəsin birlikdə çalışmalı olduğunu vurğulayaraq dedi: “Və biz hər şeyi şərəflə etməliyik”. Dünyanın böyük bir hissəsinin Ukraynaya kömək etməyə hazır olmasından və ABŞ-ın məsələyə konstruktiv yanaşmasından məmnunluqlarını vurğulayan Zelenski dedi: “Dünən demək olar ki, bütün gün görüşlərlə dolu idi və bu, çətin və son dərəcə əhatəli bir səy idi”. O bildirdi ki, Ukraynanı təmsil edən komanda yeni addımlarla bağlı layihənin qiymətləndirilməsini təqdim etdi və bunu həqiqətən düzgün yanaşma hesab etdi. O əlavə etdi: “Mən ABŞ prezidenti Donald Trampla həssas məsələləri müzakirə edəcəyəm. Ukrayna heç vaxt sülhün yolunda dayanmayacaq. Bu, bütün Ukrayna üçün ortaq bir prinsipdir və milyonlarla ukraynalı şərəfli bir sülh gözləyir və layiqdir. Bunun üçün lazım olan hər şeyi edəcəyik və mümkün qədər tez işləməyə hazırıq”.
Şayəstə
