Prezident İlham Əliyevin ABŞ-a səfəri təkcə ölkəmizdə deyil, bütün dünya ictimaiyyətində böyük maraq doğurdu.
Azərbaycanın müstəqillik qazandıqdan sonra ABŞ-la qurduğu qarşılıqlı və faydalı əməkdaşlıq münasibətləri zaman-zaman müxtəlif mərhələlərdən keçib. Bayden–Blinken administrasiyasının bu münasibətlərə soyuq yanaşması, ədalətsizliyi əməkdaşlıq tellərinin zəifləməsinə səbəb olan addımlarından sonra Donald Trampın ölkə başçımızı Vaşinqtona işgüzar səfərə dəvət etməsi xüsusi əhəmiyyət daşıyırdı. Əslində, Trampın sosial media platformalarında Azərbaycan Prezidentini səbirsizliklə gözlədiyini bildirməsi, bu görüşə verdiyi önəmin və ikitərəfli münasibətlərin yeni mərhələyə qədəm qoyacağının göstəricisi idi.
Prezident İlham Əliyevin Vaşinqton səfəri İkinci Qarabağ müharibəsindən sonra yaranan yeni regional və beynəlxalq düzənin fonunda baş tutdu. Artıq Azərbaycan öz ərazi bütövlüyünü tam təmin etmiş, bölgədə yeni geosiyasi reallıqlar formalaşdırmışdı. Prezident Əliyev bu səfərdə qalib lider, regionun gələcəyini müəyyən edən əsas fiqur kimi çıxış edirdi. Vaşinqton üçün isə bu görüş Azərbaycanla münasibətlərin təkcə enerji və iqtisadi əməkdaşlıqla məhdudlaşmadığını, eyni zamanda regional sabitlik və təhlükəsizlik sahəsində də bərabərhüquqlu və strateji tərəfdaşlığın vacibliyini təsdiqləyirdi.
İkincisi, Cənubi Qafqazda uzunmüddətli sülhün təmin olunması məsələsində ABŞ-ın daha fəal mövqe sərgiləməsi və prosesə destruktiv deyil, konstruktiv yanaşması, əvvəlki illərin münaqişə dövründə Minsk qrupu çərçivəsində işğalı əbədiləşdirməyə deyil, sülhə töhfə verməyə çalışması alqışa layiqdir.
Üçüncüsü, Prezident İlham Əliyevin ABŞ Prezidenti Donald Tramp tərəfindən yüksək səviyyədə qarşılanması, Vaşinqtonda keçirilmiş üçtərəfli görüş və onun nəticəsi olaraq imzalanan Birgə Bəyannamə yalnız Azərbaycan–ABŞ münasibətlərinin inkişafına deyil, həm də regionda sülh və sabitliyə töhfə verən mühüm siyasi sənəd kimi tarixə düşdü.
Dördüncüsü, imzalanmış Birgə Bəyannamədə ATƏT-in Minsk qrupunun fəaliyyətinə son qoyulması və Naxçıvanla Azərbaycanın digər bölgələri arasında nəqliyyat əlaqələrinin təmin olunması ilə bağlı müddəaların yer alması xüsusi əhəmiyyət daşıyır. Bu, həm Azərbaycanın ərazi bütövlüyünün beynəlxalq səviyyədə tanınmasının, həm də regionda kommunikasiyaların açılması istiqamətində atılan mühüm addım kimi qiymətləndirilə bilər. Nəhayət, Ermənistan Respublikasının ərazisində həyata keçirilməsi planlaşdırılan “Beynəlxalq Sülh və Rifah naminə Tramp Marşrutu” (TRIPP) bağlantı layihəsi çərçivəsində Amerika Birləşmiş Ştatları və qarşılıqlı razılaşdırılmış üçüncü tərəflərlə əməkdaşlıq imkanlarının müəyyən edilməsi xüsusi önəm daşıyır. Bundan başqa Almatı Bəyannaməsinə sadiqlik, ölkəmizin beynəlxalq hüquq normalarına, xüsusilə də dövlətlərin ərazi bütövlüyü və sərhədlərin toxunulmazlığı prinsiplərinə daim hörmətlə yanaşdığını bir daha nümayiş etdirir.
Prezidentin ABŞ səfəri çərçivəsində Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması barədə Azərbaycan Respublikası Hökuməti ilə Amerika Birləşmiş Ştatları Hökuməti arasında Anlaşma Memorandumunun imzalanması, ölkəmizə olan etimadın və qarşılıqlı inamın bariz göstəricisi kimi yadda qaldı.
Beləliklə, Ali Baş Komandan kimi döyüş meydanında ölkəmizin ərazi bütövlüyünü tam təmin edən İlham Əliyev Prezident kimi diplomatik masada da Azərbaycanın maraqlarını uğurla müdafiə edərək növbəti böyük zəfəri təmin etdi. Bu tarixi uğuru əldə edən ilk lider olaraq müasir Azərbaycanın inkişafında yeni mərhələ açdı və öz adı ilə Azərbaycan tarixində əbədi olaraq iz qoydu.
Təkcə xalq deyil, tarix də qəhrəmanları sevir və onların adlarını əbədi yaşadır!
Əli Həziquliyev
“Elchi.az” saytının baş redaktoru, Ədalət, Hüquq və Demokratiya (ƏHD) partiyası sədrinin müavini
