Aralıq dənizi, Türkiyə, Avropa, ABŞ, Yaxın Şərq, Okeaniya və Asiya da daxil olmaqla dünyanın bir çox yerlərində regional temperatur rekordları qeydə alınır və yaxın günlərdə temperaturun yüksək səviyyədə qalacağı gözlənilir.
Elchi.az xəbər verir ki, iyunun ilk yarısında Aralıq dənizi və Avropanın müxtəlif bölgələrində, o cümlədən Türkiyədə güclənən həddindən artıq istilər varlığını yenidən hiss etdirir.
Dünən Türkiyədə havanın temperaturu mövsümi ortalamalardan 6-12 dərəcə yüksək olub, ölkə üzrə ən yüksək temperatur Şırnakın Silopi rayonunda 50,5 dərəcə Selsi olub.
Termorometrlər Mardinin Kızıltepedə 49,6, Cizrədə 49,4, Nusaybində isə 49,3 dərəcəyə çatıb. Dünən Türkiyədə altı ölçmə məntəqəsində havanın temperaturu 49 dərəcəni keçib.
Yunanıstanda Peloponnes yarımadasının Skala bölgəsində havanın temperaturu 46 dərəcəyə çatıb. Rodos adasındakı Lindos şəhərində qeydə alınan ən yüksək temperatur 43,6 dərəcə Selsi olub. Albaniyanın cənub-qərbində yerləşən Vlorëdə havanın temperaturu 42,4 dərəcə Selsi rekordu qırıb, Sarayevoda isə 39 dərəcəyə çatıb.
Skandinaviya ölkəsi olan Finlandiyanın Meteorologiya İnstitutu, ölkənin bəzi bölgələrində 14-cü gün ardıcıl olaraq 30 dərəcə Selsi temperaturu qeydə aldığını və bunun 1961-ci ildə qeydlər başlayandan bəri ilk dəfə qeydə alındığını bildirdi.
Eynilə, İsveçdə müxtəlif bölgələrdə gündüz temperatur 30 dərəcəyə, gecə isə 23 dərəcəyə çatıb.
Cənub-Şərqi Asiyada ən yüksək temperatur Taylandın cənubundakı Çavanqda 36,5 dərəcəyə, Filippinin cənubundakı Mindanao adasındakı Surigaoda isə 36,2 dərəcəyə çatıb.
İndoneziyanın Palu şəhərində 37 dərəcəyə çatan temperatur Malayziyaya da təsir edib.
Yaponiyanın şimalındakı Otaruda havanın temperaturu 34 dərəcəyə çatıb, ölkənin digər bölgələrində isə 30 dərəcəni keçib. ABŞ Milli Okean və Atmosfer İdarəsi (NOAA) yüksək təzyiq səbəbindən təhlükəli istilərin davam edəcəyi barədə xəbərdarlıq edib.
İraqın Bağdad şəhərində bu gün havanın temperaturunun 49 dərəcəyə çatacağı gözlənilir.
Misir, Oman, Yaxın Şərqin bir çox bölgəsi, Türkiyə, Yunanıstan və Şərqi Aralıq dənizinin bəzi bölgələrində də həftəsonu temperaturun kifayət qədər yüksək olacağı gözlənilir.
Şayəstə Hüseynova
