Ukrayna Milli Təhlükəsizlik və Müdafiə Şurasının katibi Rustem Umerov Türkiyənin Rusiya ilə Ukrayna arasındakı danışıqlardakı rolunu şərh edərək, “Türkiyəyə bu platformadakı asanlaşdırıcı roluna görə təşəkkür etmək istərdik; bu, dialoq və sülh üçün mühüm platformadır” deyib.
Elchi.az xəbər verir ki, İstanbulda Türkiyənin ev sahibliyi etdiyi Türkiyə-Rusiya-Ukrayna Üçtərəfli Görüşündən sonra keçirilən mətbuat konfransında Ukrayna nümayəndə heyətinin üzvləri çıxış ediblər.
Umerov Rusiya nümayəndə heyəti ilə üçüncü görüşü başa vurduqlarını və Ukraynanın Ukrayna prezidenti Vladimir Zelenskinin ifadə etdiyi prioritetləri açıq şəkildə çatdırdığını bildirib.
Əsas prioritetin Zelenski ilə Rusiya prezidenti Vladimir Putin arasında görüşün keçirilməsi olduğunu vurğulayan Umerov, ABŞ prezidenti Donald Tramp və prezident Rəcəb Tayyib Ərdoğanın bu potensial görüşdə iştirakının son dərəcə dəyərli olacağını bildirib.
Umerov vurğuladı ki, həqiqi atəşkəs və bütün mülki strukturlara hücumların dayandırılması davamlı sülh üçün zəruri ilk addımdır. Umerov Rusiya tərəfinə liderlər arasında avqustun sonuna qədər görüş keçirməyi təklif etdiklərini və bunun qəbul ediləcəyi təqdirdə Moskvanın konstruktiv mövqe sərgiləyəcəyini və bunu bütün tərəfdaşlara nümayiş etdirəcəyini bildirib.
Şayəstə Hüseynova
