ABŞ prezidenti Donald Tramp Yaponiya ilə ticarət sazişinin tamamlandığını elan edərək, ölkənin ABŞ-a 15 faizlik rüsum ödəyəcəyini açıqlayıb.
Elchi.az xəbər verir ki, “Truth Social” hesabında paylaşdığı yazıda Tramp Yaponiya ilə razılaşmanı “bəlkə də indiyə qədər edilən ən böyük razılaşma” kimi qiymətləndirib.
O, Yaponiyanın onun göstərişi ilə ABŞ-a 550 milyard dollar sərmayə qoyacağını və qazancın 90 faizini alacağını bildirərək, “Bu müqavilə yüz minlərlə iş yeri yaradacaq. Daha əvvəl belə bir şey olmamışdı” dedi.
Tramp Yaponiyanın avtomobil və yük maşınları, düyü və digər kənd təsərrüfatı məhsulları da daxil olmaqla ölkəni ticarətə açacağını vurğulayıb.
Yaponiyanın ABŞ-a 15 faizlik qarşılıqlı rüsum ödəyəcəyini vurğulayan Tramp, “Bu, ABŞ üçün çox həyəcanlı bir zamandır, xüsusən də Yaponiya ilə hər zaman əla münasibətimiz olacağı üçün” deyib. Bu arada Tramp Ağ Evdəki çıxışında Yaponiya ilə əldə olunan razılaşmaya toxunub və mayeləşdirilmiş təbii qaz (LNG) mövzusunda da razılaşma əldə ediləcəyini bildirib.
Tramp həmçinin qeyd edib ki, Avropa və digər ticarət tərəfdaşları ilə müzakirələr aparılacaq.
Aprelin 2-də iki ölkə arasında ikitərəfli tarifləri açıqlayanda ABŞ prezidenti Tramp Yaponiyaya 24% tarif tətbiq ediləcəyini bəyan etdi.
Bu ay Yaponiyaya göndərdiyi tarif məktubunda Tramp həmçinin Yaponiyaya 1 avqust tarixindən etibarən sektor tariflərindən ayrı olaraq 25% tarif tətbiq ediləcəyini qeyd edib.
Tramp məktubunda düzəlişlərin “bəlkə də” edilə biləcəyini ifadə edərək, “Bu tariflər ölkənizlə münasibətlərimizdən asılı olaraq yuxarı və ya aşağı düzəldilə bilər” deyib.
Şayəstə Hüseynova
