Rusiya prezidenti Vladimir Putin İran xalqına kömək etmək üçün səy göstərdiklərini bildirib və “İrana qarşı hücumlar heç bir əsası olmayan səbəbsiz təcavüzdür” deyib.
Elchi.az xəbər verir ki, Putin İranın xarici işlər naziri Abbas Əraqçini Kreml sarayında qəbul edib.
Görüşün mətbuata açıq iclasında çıxış edən Putin Rusiya və İranın etibarlı münasibətlərə malik olduğuna işarə edərək, “İran xalqına kömək etmək üçün səy göstəririk” deyib.
Rusiyanın Yaxın Şərqdə baş verən proseslərə yanaşmasının bəlli olduğunu bildirən Putin, “İrana qarşı hücumlar əsassız və səbəbsiz təcavüzdür. Rusiya Xarici İşlər Nazirliyi bizim yanaşmamızı açıq şəkildə ifadə edib və Birləşmiş Millətlər Təşkilatının Təhlükəsizlik Şurasında tutduğumuz mövqeyi bilirsiniz” deyib.
Əraqçi Rusiyanın “tarixin doğru tərəfində” olduğunu da bildirib və əlavə edib: “İsrail və ABŞ-ın İrana qarşı hərəkətləri qeyri-qanunidir və İranın özünü qorumaq haqqı var. Bu hərəkətləri pislədikləri üçün rusiyalı həmkarlarımıza minnətdarıq”.
İranın Rusiya ilə Buşəhr Atom Elektrik Stansiyasını tikdiyini xatırladan Əraqçi, “Rusiya yaxşı razılaşmaların əldə olunmasında müsbət rol oynadı. İsrailin, daha sonra ABŞ-ın obyektlərimizə hücum etməsi səbəbindən gərginliyin səviyyəsi hər keçən gün artır”, – deyib.
Nuranə Məmmədova
