“Özümü və çağdaş dünyamızı 20 Yanvar şəhidlərinə borclu sayıram
“Ərəstun Oruclu: “20 yanvar tarixə Azərbaycan xalqının müstəqillik uğrunda mübarizəsində ilk ən çox itki verdiyi bir gün kimi yazılıbdır. 20 yanvar hadisəsi Azərbaycan xalqına milli dövlətçiliyin zəruriliyini, müstəqil dövlətçiliyin qurulması ehtiyyacını açıq şəkildə bəyan etdi. Göstərdi ki, Azərbaycan yalnız və yalnız özünün müstəqil dövləti olduqda təhlükələrdən sığortalana bilər. 20 Yanvarın baş verməsi də, heç də təsadüfi olmadı. Ona görə ki, 1988-ci ildən başlayan Qarabağdakı erməni seperatçılığının Moskva tərəfindən açıq himayə olunmasını Azərbaycanda hər kəs bilirdi. Bunu görmək bilmək istəyən Azərbaycanın yaramaz kommusnist rəhbərliyi idi, çünki onlar öz xalqlarına xidmət edirdi.
Buna baxmayaraq onlar xalqın gücü qarşısında dayana bilmədilər.
İndi bir çoxları 20 Yanvar haqqında onun əhəmiyyətini itirmək, bu bir növ arxa plana keçirmək fonunda danışır. Amma bu yanlışdır, ona görə ki, 20 Yanvar artıq tarixdə öz yerini tutubdur. Bu hadisə müasir Azərbaycanın dövlətçilik tarixinin ən parlaq səhifəsidir”.
Fərhad Mehdiyev: “Mən 20 Yanvarı faciə saymıram. O millətimizin dirçəlib, formalaşmasında bir qəhrəmanlıq nümunəsidir. Xalqın əzminin qırılmadığını göstərən bir hadisədir.O gün müstəqilliyə doğru ilk addımlarımızdan biri idi. Çünki bu imperiyaya qarşı atılan bir addım idi. Bu addım rus imperiyasının dağılmasında önəmli yer tuturdu. Bu günü qeyd etməklə və gələcək nəsillərə yaddaş kimi ötürməklə, hər birimiz dövlətçiliyimizi bərkidib qoruyuruq”.
İbrahim Rüstəmli: ” 20 Yanvar Azərbaycan xalqının milli oyanış hərəkatında ən mühüm tarixi hadisədir. Axına qarşı cəsarətlə addımlamaq, təpədən dırnağadək silahlanmış zirehli hərbi maşınların, qəzəbli əsgərlərin önünə yalın əllə, yalnız azadlıq ideyaları ilə çıxmaq və bu ideyaların gerçəkləşməsi naminə öz canından keçmək hər xalqa nəsib olmayan böyük bir şərəf, böyük bir örnəkdir. Yurddaşlarımızın həmrəyliyini, bütövlüyünü, azadlıq yanğısını özündə yaşadan bu möhtəşəm təqvim xalqımızı imperiya cəlladlarına tanıtmaq və azadlıq ideyalarını stimullaşdırmaq baxımında böyük mənəvi əhəmiyyət daşıyır. Qətlə yetirilmiş dinc insanların qanı ilə suvarılan Bakı məhz həmin gün yalnız Azərbaycanın deyil, heç bir hədd-hüdud tanımayan azadlıq mücadiləsinin, sərhədsiz azadlıq adasının paytaxtına çevrildi.O günlərin canlı şahidi kimi, yaşanan bu möhtəşəm hürriyyət salnaməsinə görə özümü və çağdaş dünyamızı 20 Yanvar şəhidlərinə borclu sayıram. Axı bu təqvim tarixin daş yaddaşına məhz onların müqəddəs qanı ilə yazılıb.
Azərbaycan öz azadlığını ləyaqətəli, vətənpərvər, cəsur övladlarını itirməklə qazandı. Ancaq onların işıqlı adını, mücadiləsini heç vaxt unutmadı. Təsadüfi deyil ki, Azərbaycan Prezidenti cənab İlham Əliyevin 2006-cı il 19 yanvar tarixli fərmanı ilə 20 Yanvar şəhidi fəxri adı almış insanların ailə üzvlərinə ayda 300 manat Prezident təqaüdü təyin olunub. Prezidentin 19 yanvar 2011-ci il tarixli fərmanına əsasən isə 20 Yanvar əlillərinə – I qrup əlillərə 150 manat, II qrup əlillərə 130 manat, III qrup əlillərə 100 manat olmaqla aylıq Prezident təqaüdü ödənilir. 20 Yanvar şəhidlərinin əmək pensiyası almaq hüququ olmayan ailə üzvlərinə kommunal, nəqliyyat və digər xidmətlərə görə, 20 Yanvar əlillərinin 16 yaşınadək (ümumtəhsil müəssisələrində əyani təhsil alanlar 18 yaşınadək) uşaqlarının hər birinə aylıq sosial müavinətlər verilir. Prezidentinin 18 mart 2014-cü il tarixli sərəncamı ilə 20 Yanvar əlilləri və şəhidlərinin respublikanın ali və orta ixtisas təhsil müəssisələrində ödənişli təhsil alan uşaqları təhsil haqqından azad olunublar. Əmək və Əhalinin Sosial Müdafiəsi Nazirliyi (ƏƏSMN) tərəfindən indiyədək 53 nəfər 20 Yanvar əlili və 20 Yanvar şəhidinin ailəsi mənzillə, 78 nəfər 20 Yanvar əlili isə minik avtomobili ilə təmin edilib. Hər il 20 Yanvar faciəsinin ildönümü ilə əlaqədar bu təbəqələrdən olanlar birdəfəlik müavinətlə təmin olunurlar. Və nəhayət, faciənin 25-ci ildönümü ilə bağlı, ƏƏSMN tərəfindən 112 şəhid ailəsinin və 316 nəfər 20 Yanvar əlilinin hər birinə 50 manat məbləğində birdəfəlik maddi yardım göstərilib.
Əlbəttə, bütün bunlar xalqımızın və dövlətyimizin yalnız 20 Yanvar hadisələrinə deyil, ümumilikdə azadlıq mücadiləsinə, bu mücadilədə həlak olanlara verdiyi yüksək önəm və dəyərdir. Allah bütün şəhidlərimizə rəhmət eləsin”.(Ölkə.Az)
Son şərhlər