Ukrayna prezidenti Volodimir Zelenski Vestminster zalında Britaniya parlamentinin üzvləri qarşısında çıxış edib. O, Londonun ilk gündən Kiyevi dəstəklədiyini bəyan edib və Ukraynaya qırıcı təyyarələrin verilməsinin zəruriliyi ilə bağlı xahişini təkrarlayıb.
Elchi.az xəbər verir ki, Zelenski çıxışı zamanı pilot dəbilqəsini çıxararaq İcmalar Palatasının spikeri Lindsey Hoyle-ə verib.
“Bizim azadlığımız var, onu qorumaq üçün bizə “qanad” verin. Mən bu gün parlamenti tərk edəcəm, güclü Britaniya təyyarələrinə görə sizə əvvəlcədən təşəkkür edirəm”, – Zelenski əlavə edib.
Xatırladaq ki, bundan əvvəl Böyük Britaniyanın Ukrayna qırıcı pilotları və dəniz piyadalarının təlimini genişləndirəcəyi məlum olmuşdu. Bu, ukraynalı pilotlar üçün Qərb qırıcılarından istifadə etmək üçün ilk təlim proqramı olacaq. Lakin hələlik Londonun təyyarələri Kiyevə təhvil verəcəyinə dair heç bir söz olmayıb.
Yeganə