Yunanıstan parlamentində 2024-cü ilin büdcəsi hakim Yeni Demokratiya partiyasının səsləri ilə təsdiqlənib.
Elchi.az bu barədə Anadolu Agentliyinə istinadən xəbər verir.
Ümumi büdcə 300 yerlik Yunanıstan parlamentində hakim Yeni Demokratiya partiyasının cəmi 158 deputatı tərəfindən təsdiqləndiyi halda, Müdafiə Nazirliyinin büdcəsi 51 “xeyr” səsinə qarşı 249 “hə” səsi ilə təsdiqlənib.
Müdafiə Nazirliyinin büdcəsini Yeni Demokratiya Partiyası, Panhellenik Sosialist Hərəkat Partiyası (PASOK) və Radikal Sol Alyans (SYRIZA) dəstəkləyib.
Yunanıstanın Baş naziri Kyriakos Mitsotakis, 2024-cü il büdcə müzakirələri zamanı etdiyi çıxışda, “Bu büdcə 14 ildən sonra dövlət qulluqçularının maaşları və səhiyyə xərclərinin artırılmasını nəzərdə tutan ilk büdcədir”-deyib.
Hökumətin hər zaman həssas təbəqələrə dəstək verəcəyini vurğulayan Mitsotakis minimum əmək haqqının 950 avroya yüksəldilməsi öhdəliyinin “yerində olduğunu” bildirib.
Nuranə Məmmədova