Yaponiya və ABŞ-ın müdafiə nazirləri iki ölkənin alyansının çəkindirmə və müdaxilə imkanlarını gücləndirmək barədə razılığa gəliblər.
Elchi.az xəbər verir ki, Yaponiyaya yeni təyin olunmuş müdafiə naziri Kihara Minoru ABŞ-ın müdafiə naziri Lloyd Ostin ilə ilk telefon danışığını keçirib. Daha sonra mətbuata açıqlama verən Kihara amerikalı həmkarı ilə görüşdə əməkdaşlıq prioritetlərini müzakirə etdiklərini və bunu “konstruktiv görüş” olaraq qiymətləndirdiyini bildirib.
Rəsmi Kyodo agentliyinin məlumatına görə, görüş zamanı Kihara və Ostin Yaponiya və ABŞ alyansının çəkindirmə və müdaxilə imkanlarını gücləndirmək barədə razılığa gəliblər.
Nazirlər Hind-Sakit Okean regionunda status-kvonu güc yolu ilə dəyişdirmək cəhdlərini aradan qaldırmaq üçün əvvəlkindən daha sıx işləməyə razılaşıblar.
Görüş zamanı Ostin Kiharanı yeni vəzifəsi münasibətilə təbrik edib və qeyd edib ki, Vaşinqton administrasiyası “Yaponiyanın müdafiəsinə sadiqliyini” bir daha təsdiqləyib.
Milli mətbuatda bildirilirdi ki, yaponiyalı nazir oktyabrın əvvəlində amerikalı həmkarı ilə görüşmək üçün Vaşinqtona gedəcək.
2021-ci ilin sentyabrında vəzifəyə başlayan Baş nazir Kişida Fumio hökuməti, son iki ildə ikinci kabinet dəyişikliyini bu ayın ortalarında elan etdi və Kihara yeni kabinetdə nazirliyin başına keçdi.
Şayəstə Hüseynova
Son şərhlər